സുപ്രീംകോടതിയുടെ അതീവ സുരക്ഷാ മേഖലയിൽ ഫോട്ടോകളും  റീലുകളും എടുക്കരുത് :  കർശന വ്യവസ്ഥകളുമായി  സർക്കുലർ

ന്യൂഡൽഹി;  അതീവ സുരക്ഷാ മേഖലയായി പ്രഖ്യാപിച്ച സുപ്രീം കോടതിയുടെ പ്രധാന പരിസരത്ത് ഫോട്ടോ എടുക്കുന്നതും സോഷ്യൽ മീഡിയ റീലുകൾ സൃഷ്ടിക്കുന്നതും വീഡിയോഗ്രാഫി ചെയ്യുന്നതും  നിരോധിച്ചുകൊണ്ടുള്ള ഉത്തരവ് പുറപ്പെടുവിച്ചു. സെപ്റ്റംബർ 10 ന് പുറപ്പെടുവിച്ച ഒരു സർക്കുലറിൽ, സുരക്ഷ കുറഞ്ഞ മേഖലയായ നിയുക്ത പുൽത്തകിടി പ്രദേശത്ത് മാധ്യമപ്രവർത്തകർക്ക് അഭിമുഖങ്ങൾ നടത്താനും വാർത്തകളുടെ തത്സമയ സംപ്രേക്ഷണം നടത്താനും സുപ്രീം കോടതി അനുവാദം നൽകിയിട്ടുണ്ട്.

"ഹൈ സെക്യൂരിറ്റി സോണിന്റെ പുൽത്തകിടിയിൽ ഫോട്ടോഗ്രാഫിക്കും വീഡിയോഗ്രാഫിക്കും മൊബൈൽ ഫോൺ ഉപയോഗിക്കുന്നത് നിരോധിച്ചിരിക്കുന്നു. ഔദ്യോഗിക ഉപയോഗത്തിനൊഴികെ, വീഡിയോഗ്രാഫി, റീലുകൾ സൃഷ്ടിക്കൽ, ഫോട്ടോ എടുക്കൽ എന്നിവയ്ക്ക് ഉപയോഗിക്കുന്ന ക്യാമറ, ട്രൈപോഡ്, സെൽഫി-സ്റ്റിക്ക് തുടങ്ങിയ ഉപകരണങ്ങൾ ഹൈ സെക്യൂരിറ്റി സോണിൽ നിയന്ത്രിക്കപ്പെടും," സുപ്രീംകോടതി പുറത്തിറക്കിയ സർക്കുലറിൽ പറയുന്നു.

മുകളിൽ പറഞ്ഞ മാർഗ്ഗനിർദ്ദേശങ്ങൾ തെറ്റിച്ചാൽ  നിയമലംഘകർക്കെതിരെ ഉചിതമായ നടപടി സ്വീകരിക്കുംമെന്നും സർക്കുലറിൽ ഉണ്ട്. മാധ്യമപ്രവർത്തകർ മാർഗ്ഗനിർദ്ദേശങ്ങൾ ലംഘിച്ചാൽ, സുപ്രീം കോടതിയുടെ ഉയർന്ന സുരക്ഷാ മേഖലയിലേക്കുള്ള അവരുടെ പ്രവേശനം ഒരു മാസത്തേക്ക് നിയന്ത്രിക്കാമെന്ന് അതിൽ പറയുന്നുണ്ട്.