2.92 കോടി രൂപ തട്ടാൻ പങ്കാളികളുടെ വ്യാജ ഒപ്പിട്ടു; സൂറത്ത് ക്രിക്കറ്റ് മേധാവി അറസ്റ്റിൽ

ഡല്‍ഹി: 2.92 കോടി രൂപയുടെ മോര്‍ട്ട്‌ഗേജ് വായ്പ ലഭിക്കുന്നതിനായി തന്റെ ബിസിനസ് പങ്കാളികളുടെ വ്യാജ ഒപ്പുകള്‍ ഉണ്ടാക്കിയെന്നും പിന്നീട് അത് തിരിച്ചടയ്ക്കുന്നതില്‍ വീഴ്ച വരുത്തിയെന്നും ആരോപിച്ച് സൂറത്ത് പോലീസ് ജില്ലാ ക്രിക്കറ്റ് അസോസിയേഷന്‍ പ്രസിഡന്റിനെ അറസ്റ്റ് ചെയ്തു.

സൂറത്ത് ജില്ലാ ക്രിക്കറ്റ് അസോസിയേഷന്‍ പ്രസിഡന്റ് കനയ്യാലാല്‍ ഒരു നിര്‍മ്മാണ സ്ഥാപനത്തിലെ പങ്കാളികളില്‍ ഒരാളാണ്.

അദ്ദേഹത്തിന്റെ പരേതനായ സഹോദരന്റെ ഭാര്യ നല്‍കിയ പരാതിയുടെ അടിസ്ഥാനത്തില്‍ വഞ്ചന, വ്യാജരേഖ ചമയ്ക്കല്‍ എന്നീ കുറ്റങ്ങള്‍ ചുമത്തി കേസെടുത്തിരുന്നുവെന്നും ക്രൈംബ്രാഞ്ചിന്റെ സാമ്പത്തിക കുറ്റകൃത്യ വിഭാഗം പറഞ്ഞു.

പോലീസ് പറയുന്നതനുസരിച്ച് കോണ്‍ട്രാക്ടര്‍ തന്റെ സഹോദരഭാര്യ നയനാബെന്നിന്റെയും അവരുടെ പരേതനായ ഭര്‍ത്താവ് ഹേമന്ത്ഭായിയുടെയും ഒപ്പുകള്‍ വ്യാജമായി നിര്‍മ്മിച്ച് അവരുടെ പങ്കാളിത്ത സ്ഥാപനത്തിന്റെ നിയന്ത്രണം നേടുന്നതിനായി വ്യാജ പവര്‍ ഓഫ് അറ്റോര്‍ണി തയ്യാറാക്കിയതായി ആരോപിക്കപ്പെടുന്നു.

നിര്‍മ്മാണ സ്ഥാപനത്തിന്റെ വ്യാജ പവര്‍ ഓഫ് അറ്റോര്‍ണി ഉപയോഗിച്ച് നഗരത്തിലെ അത്വാലിന്‍സ് പ്രദേശത്തുള്ള സ്ഥാപനത്തിന്റെ വസ്തുവില്‍ 2.92 കോടി രൂപയുടെ മോര്‍ട്ട്‌ഗേജ് വായ്പ അദ്ദേഹം നേടിയെടുത്തതായി ആരോപണമുണ്ട്.