തഹാവൂര്‍ റാണയെ പാര്‍പ്പിക്കുന്നത് അജ്മല്‍ കസബിനെ തടവിലാക്കിയിരുന്ന അതേ ഹൈ സെക്യൂരിറ്റി ബാരക്കില്‍ തന്നെ

മുംബൈ: 26/11 ഭീകരാക്രമണക്കേസിലെ പ്രതിയായ തഹാവൂര്‍ റാണയെ ഭീകരന്‍ അജ്മല്‍ കസബിനെ തടവിലാക്കിയിരുന്ന മുംബൈയിലെ ആര്‍തര്‍ റോഡ് ജയിലിലെ അതേ ഹൈ സെക്യൂരിറ്റി ബാരക്കില്‍ തന്നെ പാര്‍പ്പിക്കുമെന്ന് റിപ്പോര്‍ട്ട്.

ഇന്ത്യയ്ക്ക് കൈമാറുന്നതിനെ ചോദ്യം ചെയ്ത് സമര്‍പ്പിച്ച ഹര്‍ജി യുഎസ് സുപ്രീം കോടതി തള്ളിയതിനെത്തുടര്‍ന്ന് പാകിസ്ഥാന്‍ വംശജനായ കനേഡിയന്‍ പൗരനായ തഹാവൂര്‍ റാണയെ ഇന്ന് വൈകി ഡല്‍ഹിയിലെത്തിക്കും.

തിരികെ കൊണ്ടുവന്നുകഴിഞ്ഞാല്‍ റാണയെ ദേശീയ അന്വേഷണ ഏജന്‍സിയുടെ (എന്‍ഐഎ) കസ്റ്റഡിയിലെടുക്കുമെന്ന് വൃത്തങ്ങള്‍ അറിയിച്ചു. 

ബൈക്കുള ജയിലിലെ പ്രോപ്പര്‍ട്ടി സെല്‍ ഓഫീസിലേക്കോ മുംബൈ പോലീസ് ആസ്ഥാനത്തെ യൂണിറ്റ് 1 ഓഫീസിലേക്കോ റാണയെ ചോദ്യം ചെയ്യലിനായി കൊണ്ടുപോകുമെന്ന് അവര്‍ പറഞ്ഞു.

2008 ലെ മുംബൈ ആക്രമണക്കേസിലെ വിചാരണ വേളയിലും 2012 ല്‍ വധശിക്ഷ നടപ്പാക്കുന്നതിന് മുമ്പും കസബിനെ പാര്‍പ്പിച്ച അതേ ഉയര്‍ന്ന സുരക്ഷാ വിഭാഗമായ ആര്‍തര്‍ റോഡ് ജയിലിലെ 12-ാം നമ്പര്‍ ബാരക്കിലാണ് റാണയെ പാര്‍പ്പിക്കുന്നതെന്ന് വൃത്തങ്ങള്‍ അറിയിച്ചു.