44 പരിക്കുകൾ, തലച്ചോറിന് ക്ഷതം: തമിഴ്‌നാട് കസ്റ്റഡി മരണത്തിൽ പോസ്റ്റ്‌മോർട്ടം റിപ്പോർട്ട് പുറത്ത്

ചെന്നൈ: തമിഴ്‌നാട് കസ്റ്റഡി മരണക്കേസില്‍ അജിത് കുമാറിന്റെ പോസ്റ്റ്മോര്‍ട്ടം റിപ്പോര്‍ട്ട് പുറത്ത്. 44 പരിക്കുകളും ആന്തരിക അവയവങ്ങളില്‍ ഗുരുതരമായ രക്തസ്രാവവും റിപ്പോര്‍ട്ടില്‍ രേഖപ്പെടുത്തുന്നുണ്ട്. ഈ കണ്ടെത്തലുകള്‍ ദീര്‍ഘകാലം നീണ്ട, തീവ്രമായ ശാരീരിക പീഡനത്തിന്റെ ശക്തമായ മെഡിക്കല്‍ തെളിവുകളാണ്.

തല, മുഖം, കൈകള്‍, കാലുകള്‍, ദേഹമൊക്കെയും ഉള്‍പ്പെടെ വിവിധ ഭാഗങ്ങളില്‍ ആഴത്തിലുള്ള മുറിവുകളും, രക്തസ്രാവവും, പേശികളുടെ തലത്തില്‍ വരെ വ്യാപിച്ച പരിക്കുകളും രേഖപ്പെടുത്തിയിട്ടുണ്ട്.

ഹൃദയം, കരള്‍, തലച്ചോര്‍, വയറുമതില്‍ എന്നിവിടങ്ങളില്‍ രക്തസ്രാവം കണ്ടെത്തി. തലച്ചോറിലും (സബ്ഡ്യൂറല്‍, സബ്അറാഖ്‌നോയ്ഡ് ഹീമറേജ്) ഗുരുതരമായ രക്തസ്രാവം ഉണ്ടായിട്ടുണ്ട്.

പരിക്കുകളുടെ ദിശയും ആഴവും പരിശോധിച്ചപ്പോള്‍ വടി, ബാറ്റണ്‍ പോലുള്ള വസ്തുക്കള്‍ ഉപയോഗിച്ച് ആവര്‍ത്തിച്ച് ലക്ഷ്യം വച്ച് മര്‍ദിച്ചതാണെന്ന് വ്യക്തമാണ്.

പരിക്കുകള്‍ ആഴത്തിലുള്ളതുമാണ്. കൈയില്‍ സിഗരറ്റ് കത്തിച്ച പാടുകള്‍ ഉള്‍പ്പെടെ പീഡനത്തിന്റെ അടയാളങ്ങളും കണ്ടെത്തി.

പോലീസ് എഫ്‌ഐആറില്‍ രേഖപ്പെടുത്തിയ സ്വാഭാവിക മരണം, ചെറിയ സംഘര്‍ഷം, അപസ്മാരം തുടങ്ങിയ അവകാശവാദങ്ങള്‍ ഈ പോസ്റ്റ്മോര്‍ട്ടം കണ്ടെത്തലുകള്‍ തള്ളിക്കളയുന്നു.