പുറത്താക്കപ്പെട്ട ജെജെഡി നേതാവിൽ നിന്ന് ഭീഷണി. സുരക്ഷ തേടി സാമ്രാട്ട് ചൗധരിക്ക് കത്തെഴുതി തേജ് പ്രതാപ്

പട്‌ന: തന്റെ ജീവന് ഭീഷണിയുണ്ടെന്ന് ചൂണ്ടിക്കാട്ടി ബീഹാര്‍ സര്‍ക്കാരില്‍ നിന്ന് സുരക്ഷ ആവശ്യപ്പെട്ട് ജനശക്തി ജനതാദള്‍ (ജെജെഡി) തലവന്‍ തേജ് പ്രതാപ് യാദവ്. ഇക്കാര്യം ആവശ്യപ്പെട്ട് ബീഹാര്‍ ഉപമുഖ്യമന്ത്രിയും ആഭ്യന്തരമന്ത്രിയുമായ സാമ്രാട്ട് ചൗധരിക്ക് ഒരു കത്തും എഴുതി.

'ഭീഷണി ഉണ്ടെന്ന് എനിക്ക് തോന്നുന്നു, അതുകൊണ്ടാണ് ഞാന്‍ സുരക്ഷ ആവശ്യപ്പെട്ടിരിക്കുന്നത്. ഇതുസംബന്ധിച്ച് സാമ്രാട്ട് ചൗധരിക്ക് ഞാന്‍ ഒരു കത്ത് എഴുതിയിട്ടുണ്ട്, സച്ചിവലയ പോലീസ് സ്റ്റേഷനില്‍ എഫ്ഐആര്‍ ഫയല്‍ ചെയ്തിട്ടുണ്ട്,' തേജ് പ്രതാപ് മാധ്യമപ്രവര്‍ത്തകരോട് പറഞ്ഞു.

പാര്‍ട്ടിയുടെ മുന്‍ ദേശീയ വക്താവ് സന്തോഷ് രേണു യാദവ് തന്നെ കൊല്ലുമെന്ന് ഭീഷണിപ്പെടുത്തിയതായി ജെജെഡി മേധാവി ഡെപ്യൂട്ടി മുഖ്യമന്ത്രിക്ക് അയച്ച കത്തില്‍ ആരോപിച്ചു.

കൊള്ളയടിക്കലും പാര്‍ട്ടി വിരുദ്ധ പ്രവര്‍ത്തനങ്ങളും സംബന്ധിച്ച റിപ്പോര്‍ട്ടുകള്‍ക്ക് ശേഷം സന്തോഷിനെ ജെജെഡിയില്‍ നിന്ന് പുറത്താക്കിയതായി തേജ് പ്രതാപ് പറഞ്ഞു. അതിനുശേഷം സോഷ്യല്‍ മീഡിയയിലെ വീഡിയോയിലൂടെ സന്തോഷ് തന്നെ കൊല്ലുമെന്ന് ഭീഷണിപ്പെടുത്തുന്നുണ്ടെന്ന് അദ്ദേഹം പറഞ്ഞു.

'ഈ വിഷയം എന്റെ ശ്രദ്ധയില്‍പ്പെടുത്തിയപ്പോള്‍, സന്തോഷ് രേണു യാദവിനോട് കാര്യങ്ങള്‍ വിശദീകരിക്കാന്‍ ഞാന്‍ പരമാവധി ശ്രമിച്ചു, പക്ഷേ അദ്ദേഹം ഞങ്ങളോട് കള്ളം പറയുക മാത്രമാണ് ചെയ്തത്. തല്‍ഫലമായി, പാര്‍ട്ടിയുടെ കേന്ദ്ര അച്ചടക്ക സമിതി സന്തോഷ് രേണു യാദവിനെ പാര്‍ട്ടിയില്‍ നിന്ന് പുറത്താക്കി,' കത്തില്‍ പറയുന്നു.

'എന്നാല്‍ സന്തോഷ് രേണു യാദവിനെ പാര്‍ട്ടിയില്‍ നിന്ന് സസ്പെന്‍ഡ് ചെയ്തതുമുതല്‍, അദ്ദേഹം ഫേസ്ബുക്ക്, യൂട്യൂബ് പോലുള്ള സോഷ്യല്‍ മീഡിയ പ്ലാറ്റ്ഫോമുകളിലൂടെ ലൈവ് വീഡിയോകളിലൂടെ തുടര്‍ച്ചയായി അധിക്ഷേപകരമായ ഭാഷ ഉപയോഗിക്കുകയും എനിക്കെതിരെ വധഭീഷണി മുഴക്കുകയും ചെയ്തു. ഇത് ഒരു സാഹചര്യത്തിലും ഉചിതമല്ല.' കത്തില്‍ കൂട്ടിച്ചേര്‍ത്തു.