"എല്ലാവരും ശത്രുക്കളെപ്പോലെയാണ്": തന്റെ ജീവന് ഭീഷണിയുണ്ടെന്ന് തേജ് പ്രതാപ് യാദവ്

പട്‌ന: തനിക്ക് ഭീഷണിയുണ്ടെന്നും ശത്രുക്കള്‍ തന്നെ കൊലപ്പെടുത്തിയേക്കാമെന്നും അവകാശപ്പെട്ട് ആര്‍ജെഡി മേധാവി ലാലു പ്രസാദിന്റെ മൂത്ത മകനും ജനശക്തി ജനതാദള്‍ നേതാവുമായ തേജ് പ്രതാപ് രംഗത്ത്.

പിതാവ് ആര്‍ജെഡിയില്‍ നിന്ന് പുറത്താക്കിയതിനെത്തുടര്‍ന്ന് അടുത്തിടെ രാഷ്ട്രീയ സംഘടന രൂപീകരിച്ച യാദവ്, ഇപ്പോള്‍ നടക്കുന്ന ബീഹാര്‍ നിയമസഭാ തെരഞ്ഞെടുപ്പില്‍ മഹുവ മണ്ഡലത്തില്‍ നിന്നാണ് മത്സരിക്കുന്നത്.

പട്നയില്‍ മാധ്യമപ്രവര്‍ത്തകരോട് സംസാരിക്കവേ യാദവ് പറഞ്ഞു, 'എന്റെ സുരക്ഷ വര്‍ദ്ധിപ്പിച്ചിട്ടുണ്ട്... എനിക്ക് ഭീഷണിയുണ്ട്. എന്റെ ശത്രുക്കള്‍ എന്നെ കൊല്ലാന്‍ പോലും സാധ്യതയുണ്ട്. എല്ലാവരും ശത്രുക്കളെപ്പോലെയാണ് തോന്നുന്നത്'.

യാദവ് തന്റെ ഇളയ സഹോദരന്‍ തേജസ്വിക്ക് ജന്മദിനാശംസകള്‍ നേര്‍ന്നു. 'എന്റെ അനുഗ്രഹങ്ങള്‍ എപ്പോഴും അദ്ദേഹത്തോടൊപ്പമുണ്ട്. അദ്ദേഹം കൂടുതല്‍ വളരട്ടെ' എന്ന് പറഞ്ഞു.

ഒരു സ്ത്രീയുമായി തനിക്ക് ബന്ധമുണ്ടെന്ന് സമ്മതിച്ചതിന്റെ ഒരു ദിവസത്തിന് ശേഷം മെയ് 25 ന് തേജ് പ്രതാപിനെ ആര്‍ജെഡിയില്‍ നിന്ന് ആറ് വര്‍ഷത്തേക്ക് പുറത്താക്കി. തന്റെ പേജ് 'ഹാക്ക് ചെയ്യപ്പെട്ടു' എന്ന അവകാശവാദത്തോടെ അദ്ദേഹം പിന്നീട് സോഷ്യല്‍ മീഡിയ പോസ്റ്റ് ഇല്ലാതാക്കിയിരുന്നു.