ബംഗാൾ തിരഞ്ഞെടുപ്പിന് മുൻപ് കൊൽക്കത്തയിൽ 'ജലവിപ്ലവം'; രണ്ട് മെഗാ കുടിവെള്ള പദ്ധതികൾ ഉടൻ കമ്മീഷൻ ചെയ്യും

കൊല്‍ക്കത്ത: പശ്ചിമ ബംഗാള്‍ നിയമസഭാ തിരഞ്ഞെടുപ്പ് അടുത്തിരിക്കെ, ദക്ഷിണ കൊല്‍ക്കത്തയിലെയും പരിസരപ്രദേശങ്ങളിലെയും കുടിവെള്ള ക്ഷാമത്തിന് ശാശ്വത പരിഹാരവുമായി തൃണമൂല്‍ കോണ്‍ഗ്രസ് ഭരിക്കുന്ന കൊല്‍ക്കത്ത മുന്‍സിപ്പല്‍ കോര്‍പ്പറേഷന്‍. ദാപ്പ, ഗാരിയ ധലൈ ബ്രിഡ്ജ് എന്നിവിടങ്ങളിലെ രണ്ട് മെഗാ കുടിവെള്ള പദ്ധതികള്‍ മാര്‍ച്ചിലോ ഏപ്രിലോ ആയി ഉദ്ഘാടനം ചെയ്യും.

ഇതോടെ ദക്ഷിണ കൊല്‍ക്കത്തയിലെ ലക്ഷക്കണക്കിന് വീടുകളില്‍ ശുദ്ധീകരിച്ച കുടിവെള്ളം നേരിട്ടെത്തും. നിലവില്‍ ഭൂഗര്‍ഭ ജലത്തെ അമിതമായി ആശ്രയിക്കുന്ന ഈ മേഖലകളില്‍ ജലനിരപ്പ് താഴുന്നത് വലിയ ആശങ്കയുണ്ടാക്കിയിരുന്നു.

ദാപ്പയിലെ പ്ലാന്റില്‍ നിന്ന് പ്രതിദിനം 20 ദശലക്ഷം ഗാലന്‍ വെള്ളവും, ഗാരിയ ധലൈ ബ്രിഡ്ജിലെ പ്ലാന്റില്‍ നിന്ന് 10 ദശലക്ഷം ഗാലന്‍ വെള്ളവും ലഭ്യമാകും.

ആകെ 30 ദശലക്ഷം ഗാലന്‍ അധിക കുടിവെള്ളമാണ് നഗരത്തിന് ലഭിക്കുക. രണ്ട് പദ്ധതികള്‍ക്കുമായി ഏകദേശം 200 കോടി രൂപയാണ് ചിലവ് പ്രതീക്ഷിക്കുന്നത്.

ടോളിഗഞ്ച്, ജാദവ്പൂര്‍, കസ്ബ, ഗാരിയ തുടങ്ങിയ ഭാഗങ്ങളിലെ 20-ലധികം വാര്‍ഡുകളിലുള്ളവര്‍ക്ക് ഇതിന്റെ പ്രയോജനം ലഭിക്കും. കൂടാതെ ഇ.എം ബൈപാസിന് ഇരുവശവുമുള്ള മേഖലകളിലും ജലമെത്തും.

പദ്ധതിക്കായി 135 കിലോമീറ്റര്‍ പുതിയ പൈപ്പ് ലൈന്‍ സ്ഥാപിക്കാനായി 350 കോടി രൂപ കൂടി നീക്കിവെച്ചിട്ടുണ്ട്. ഇതില്‍ 50 കിലോമീറ്റര്‍ ഇതിനകം പൂര്‍ത്തിയായി.