യാത്രക്കാരുടെ ശ്രദ്ധയ്ക്ക്, നാളെ മുതൽ ട്രെയിൻ ടിക്കറ്റുകളുടെ നിരക്ക് കൂടും. അറിയേണ്ടതെല്ലാം

ഡൽഹി: ചൊവ്വാഴ്ച മുതൽ ട്രെയിന്‍ ടിക്കറ്റുകള്‍ക്ക് നിരക്കുവര്‍ധിക്കും. വന്ദേ ഭാരത് ഉള്‍പ്പടെയുള്ള എല്ലാ ട്രെയിനുകൾക്കും ടിക്കറ്റ് നിരക്ക് വര്‍ധന ബാധകമാണ്. 

എസി കോച്ചുകളില്‍ കിലോമീറ്റര്‍ നിരക്ക് രണ്ടു പൈസയും സെക്കന്റ് ക്ലാസ് ടിക്കറ്റുകള്‍ക് ഒരു പൈസ വീതവുമാണ് ടിക്കറ്റ് നിരക്ക് വർധിക്കുന്നത്.

അതേസമയം ഓര്‍ഡിനറി നോണ്‍ എസി ടിക്കറ്റുകള്‍ക്കു 500 കിലോമീറ്റര്‍ വരെ വര്‍ധനയില്ലെന്ന് റെയിൽവേ അറിയിച്ചു. നിരക്ക് സംബന്ധിച്ച പട്ടിക റെയിവേ ബോര്‍ഡ് തിങ്കളാഴ്ച പുറത്തിറക്കി. സബര്‍ബന്‍ ടിക്കറ്റുകളില്‍ ഇപ്പോള്‍ ടിക്കറ്റ് വര്‍ധനയില്ല. 

സീസണ്‍ ടിക്കറ്റുകള്‍ക്കും നിരക്ക് വര്‍ധന ബാധകമല്ല എന്നും റെയിൽവേ വ്യക്തമാക്കിയിട്ടുണ്ട്. നിലവിൽ എസി ക്ലാസ് 3 ടയര്‍, ചെയര്‍കാര്‍ , 2 ടയര്‍, ഫസ്റ്റ് ക്ലാസ് എന്നിവക്കാണ് 2 പൈസ വീതം നിരക്ക് വർധിപ്പിച്ചിരിക്കുന്നത്.

നോണ്‍ എസി, ഓര്‍ഡിനറി ട്രെയിനുകള്‍ക് അര പൈസ വീതമാണ് ടിക്കറ്റ് നിരക്കിൽ വര്‍ധന. എന്നാല്‍ ആദ്യ 500 കിലോമീറ്റര്‍ ടിക്കറ്റുകള്‍ക്ക് നിരക്ക് വർധന ബാധകമല്ല. 1500 മുതല്‍ 2500 കിലോമീറ്റര്‍ വരെയുള്ള യാത്രക്ക് 10 രൂപ വീതവും 2501 മുതല്‍ 3000 വരെയുള്ള ടിക്കറ്റുകള്‍ക്ക് 15 രൂപയും കൂടും.