ത്രിപുരയിലെ വിദ്യാർത്ഥിയുടെ കൊലപാതകം: ആറാമത്തെ പ്രതിയെ പിടികൂടാൻ നേപ്പാളിലേക്ക് പോലീസ് സംഘത്തെ അയച്ചു; കർശന നടപടിയെടുക്കുമെന്ന് മുഖ്യമന്ത്രി ധാമി

ഡെറാഡൂണ്‍: ഡെറാഡൂണില്‍ പഠിക്കുകയായിരുന്ന ത്രിപുര വിദ്യാര്‍ത്ഥിയെ കൊലപ്പെടുത്തിയ കേസില്‍ ഉള്‍പ്പെട്ട ആറാമത്തെ പ്രതിയെ പിടികൂടാന്‍ ഉത്തരാഖണ്ഡ് പോലീസ് നേപ്പാളിലേക്ക് സംഘത്തെ അയച്ചു.

ത്രിപുരയിലെ ഉനകോട്ടി ജില്ലയില്‍ താമസിക്കുന്ന 24 കാരന്‍ ഏഞ്ചല്‍ ചക്മയാണ് കൊല്ലപ്പെട്ടത്. ഇളയ സഹോദരന്‍ മൈക്കിളിനൊപ്പം ഡെറാഡൂണിലെ ഒരു സ്വകാര്യ സര്‍വകലാശാലയില്‍ എംബിഎ പഠിക്കുകയായിരുന്നു ഏഞ്ചല്‍.

ഡിസംബര്‍ 9 ന് ഡെറാഡൂണിലെ സെലാകുയി മാര്‍ക്കറ്റില്‍ വെച്ച് 22 വയസ്സുള്ള സൂരജ് ഖവാസുമായും മറ്റ് അഞ്ച് പേരുമായും അയാള്‍ തര്‍ക്കത്തിലേര്‍പ്പെട്ടു. ആറ് പ്രതികള്‍ കത്തികള്‍ ഉപയോഗിച്ച് ഏഞ്ചലിനെ ആക്രമിച്ചു, ഡിസംബര്‍ 26 ന് പരിക്കുകളോടെ ഏഞ്ചല്‍ മരിച്ചു. 

ആറ് പ്രതികളില്‍ അഞ്ച് പേരെ അറസ്റ്റ് ചെയ്തിട്ടുണ്ട്, എന്നാല്‍ നേപ്പാളിലെ കാഞ്ചന്‍പൂര്‍ ജില്ലയില്‍ താമസിക്കുന്ന യജ്ഞരാജ് അവസ്തി ഒളിവിലാണ്. ഇയാളെ അറസ്റ്റ് ചെയ്യുന്നവര്‍ക്ക് 25,000 രൂപ പാരിതോഷികം പോലീസ് പ്രഖ്യാപിച്ചു, ഇയാളെ കണ്ടെത്താന്‍ നേപ്പാളിലേക്ക് ഒരു സംഘത്തെ അയച്ചു.

ഏഞ്ചലിന്റെ കൊലപാതകത്തില്‍ പ്രതിഷേധം വര്‍ദ്ധിച്ചുവരുന്ന സാഹചര്യത്തില്‍, പ്രതികള്‍ക്കെതിരെ കര്‍ശന നടപടിയെടുക്കുമെന്ന് മുഖ്യമന്ത്രി പുഷ്‌കര്‍ സിംഗ് ധാമി മുന്നറിയിപ്പ് നല്‍കി. ഉത്തരാഖണ്ഡില്‍ താമസിക്കുന്ന ഓരോ പൗരന്റെയും സുരക്ഷയ്ക്കും തന്റെ സര്‍ക്കാര്‍ പ്രതിജ്ഞാബദ്ധമാണെന്ന് ശനിയാഴ്ച പുറത്തിറക്കിയ പ്രസ്താവനയില്‍ ധാമി പറഞ്ഞു.

'ക്രമസമാധാന പാലനത്തില്‍ കളിക്കുന്നവര്‍ സര്‍ക്കാരില്‍ നിന്ന് ഒരു ദയയും പ്രതീക്ഷിക്കരുത്. ഇത്തരം അക്രമികളെ ഒരു കാരണവശാലും വെറുതെ വിടില്ല,' ഒളിവില്‍ പോയ പ്രതികളെ വേഗത്തില്‍ അറസ്റ്റ് ചെയ്യാന്‍ പോലീസിന് നിര്‍ദ്ദേശം നല്‍കിയിട്ടുണ്ടെന്നും അദ്ദേഹം പറഞ്ഞു.