ഇന്ത്യൻ ഉൽപ്പന്നങ്ങൾക്ക് ഇനി എത്ര ശതമാനം നികുതി? ട്രംപിന്റെ പുതിയ താരിഫ് ഉത്തരവിൽ പുകയുന്ന ആശയക്കുഴപ്പങ്ങൾ

വാഷിംഗ്ടണ്‍: യുഎസ് സുപ്രീം കോടതിയുടെ ചരിത്രപ്രധാനമായ വിധിക്ക് പിന്നാലെ ഇന്ത്യന്‍ ഉല്‍പ്പന്നങ്ങള്‍ക്കുമേല്‍ അമേരിക്ക ചുമത്തുന്ന നികുതി എത്രയായിരിക്കും എന്നതിനെച്ചൊല്ലി ആശയക്കുഴപ്പം നിലനില്‍ക്കുന്നു. ട്രംപിന്റെ വിവാദമായ താരിഫ് നയങ്ങള്‍ കോടതി റദ്ദാക്കിയതോടെ, ഇന്ത്യയുടെ നികുതി 18 ശതമാനമാണോ അതോ 10 ശതമാനമാണോ എന്നതിലാണ് ഇപ്പോള്‍ തര്‍ക്കം നടക്കുന്നത്.

ഈ മാസം ആദ്യം ട്രംപും ഇന്ത്യയും തമ്മിലുണ്ടാക്കിയ ധാരണപ്രകാരം നികുതി 18 ശതമാനമായി നിശ്ചയിച്ചിരുന്നു. റഷ്യന്‍ എണ്ണ വാങ്ങിയതിന്റെ പേരില്‍ ഇന്ത്യക്ക് ഏര്‍പ്പെടുത്തിയിരുന്ന 25% അധിക നികുതി ട്രംപ് നീക്കം ചെയ്തതോടെയാണ് ഇത് 18 ശതമാനത്തിലെത്തിയത്.

എന്നാല്‍, വെള്ളിയാഴ്ച സുപ്രീം കോടതി ട്രംപിന്റെ നികുതി വര്‍ദ്ധിപ്പിക്കാനുള്ള അധികാരം റദ്ദാക്കി. ഇതോടെ ഇന്ത്യ നല്‍കേണ്ടിയിരുന്ന നികുതി സ്വാഭാവികമായും പഴയ നിരക്കായ 3.5 ശതമാനത്തിലേക്ക് താഴേണ്ടതായിരുന്നു.

കോടതി വിധിയില്‍ പ്രകോപിതനായ ട്രംപ്, ശനിയാഴ്ച തന്നെ പുതിയൊരു ഉത്തരവില്‍ ഒപ്പുവെച്ചു. സെക്ഷന്‍ 122 എന്ന നിയമം ഉപയോഗിച്ച് എല്ലാ രാജ്യങ്ങള്‍ക്കും 10% അധിക നികുതി അദ്ദേഹം പ്രഖ്യാപിച്ചു.

ഇന്ത്യയുടെ കാര്യത്തില്‍ ട്രംപ് പറഞ്ഞത് 18% തന്നെ തുടരുമെന്നാണ്. എന്നാല്‍ വൈറ്റ് ഹൗസ് നല്‍കുന്ന വിശദീകരണം നിയമപരമായി മറ്റൊന്നാണ്. നിലവിലെ കണക്കുകള്‍ പ്രകാരം ഇന്ത്യ ഇനി താഴെ പറയുന്ന നിരക്കിലാകും നികുതി നല്‍കേണ്ടി വരിക:

അടിസ്ഥാന നികുതി: 3.5%

ട്രംപിന്റെ പുതിയ ആഗോള നികുതി: 10%

ആകെ നികുതി: 13.5%

ഫെബ്രുവരി 24 മുതല്‍ ഈ പുതിയ നിരക്ക് (13.5%) പ്രാബല്യത്തില്‍ വരുമെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്.

അമേരിക്കന്‍ പ്രസിഡന്റുമാര്‍ ഇതുവരെ ഉപയോഗിക്കാത്ത ഒരു നിയമമാണിത്. ഇതനുസരിച്ച് കോണ്‍ഗ്രസിന്റെ അനുമതിയില്ലാതെ 150 ദിവസത്തേക്ക് 15% വരെ നികുതി ചുമത്താന്‍ പ്രസിഡന്റിന് അധികാരമുണ്ട്. 150 ദിവസത്തിന് ശേഷം ഇത് തുടരണമെങ്കില്‍ കോണ്‍ഗ്രസിന്റെ അനുമതി ആവശ്യമാണ്.