കരൂരിലെ തിക്കിലും തിരക്കിലും പെട്ട് നിരവധി പേര്‍ മരിച്ച സംഭവത്തില്‍ സിബിഐ അന്വേഷണം ആവശ്യപ്പെട്ടുള്ള ഹര്‍ജി മദ്രാസ് ഹൈക്കോടതി തള്ളി

ചെന്നൈ: സെപ്റ്റംബര്‍ 27 ന് തമിഴ്നാട്ടിലെ കരൂരില്‍ നടനും രാഷ്ട്രീയക്കാരനുമായ വിജയ് പങ്കെടുത്ത റാലിക്കിടെയുണ്ടായ തിക്കിലും തിരക്കിലും പെട്ട് 41 പേര്‍ കൊല്ലപ്പെട്ട സംഭവത്തില്‍ സിബിഐ അന്വേഷണം ആവശ്യപ്പെട്ടുള്ള ഹര്‍ജി മദ്രാസ് ഹൈക്കോടതി തള്ളി. 

സംഭവത്തിന് പിന്നില്‍ ഉദ്യോഗസ്ഥരുടെ അനാസ്ഥയുണ്ടാകാമെന്ന് ആരോപിച്ച് ബിജെപി നേതാവ് ഉമാ ആനന്ദന്‍ സമര്‍പ്പിച്ച ഹര്‍ജിയിലാണ് കോടതിയുടെ ഉത്തരവ്.

ജസ്റ്റിസുമാരായ എം ദണ്ഡപാണി, എം ജോതിരാമന്‍ എന്നിവരടങ്ങുന്ന രണ്ടംഗ ബെഞ്ച് ആനന്ദന്റെ ഹര്‍ജി തള്ളുകയും ബിജെപി നേതാവിനോട് ഹൈക്കോടതിയുടെ മധുര ബെഞ്ചിനെ സമീപിക്കാന്‍ ആവശ്യപ്പെടുകയും ചെയ്തു. 

തമിഴ്ഗ വെട്രി കഴകം (ടിവികെ) നാമക്കല്‍ ജില്ലാ സെക്രട്ടറി എന്‍ സതീഷ് കുമാറിന്റെ ജാമ്യാപേക്ഷയും ഹൈക്കോടതി തള്ളി.

പൊതു സ്വത്തുക്കള്‍ക്ക് നാശനഷ്ടങ്ങള്‍ വരുത്തുന്നത് ടിവികെ കേഡര്‍മാര്‍ ഒഴിവാക്കണമെന്ന് കുമാര്‍ ഉറപ്പാക്കണമായിരുന്നുവെന്നും കുടിവെള്ളം, ഭക്ഷണം തുടങ്ങിയ അടിസ്ഥാന സൗകര്യങ്ങള്‍ ഒരുക്കാതെ വിജയ്യുടെ പാര്‍ട്ടിക്ക് എങ്ങനെ ഇത്തരമൊരു പൊതു പരിപാടി സംഘടിപ്പിക്കാന്‍ കഴിയുമെന്ന് ആശ്ചര്യപ്പെട്ടുവെന്നും കോടതി പറഞ്ഞു.