ജമ്മു കശ്മീരിലെ ഉധംപൂരിൽ വെടിവയ്പ്പിൽ ഒരു സൈനികന് വീരമൃത്യു; നാല് ജെയ്ഷ് ഭീകരർ കുടുങ്ങി

ഡല്‍ഹി: ജമ്മു കശ്മീരിലെ ഉധംപൂര്‍ ജില്ലയില്‍ തീവ്രവാദികളുമായി നടന്ന ഏറ്റുമുട്ടലില്‍ ഒരു സൈനികന് വീരമൃത്യു. ജയ്‌ഷെ-ഇ-മുഹമ്മദ് തീവ്രവാദികളെന്ന് കരുതുന്ന മൂന്ന് മുതല്‍ നാല് പേര്‍ വരെ ഏറ്റുമുട്ടലില്‍ കുടുങ്ങിയതായി റിപ്പോര്‍ട്ടുണ്ട്.

നേരത്തെ, കിഷ്ത്വാറില്‍ മറ്റൊരു വെടിവയ്പ്പ് നടന്നതായി സൈന്യം പറഞ്ഞിരുന്നെങ്കിലും, പിന്നീട് ഉധംപൂരില്‍ മാത്രമാണ് ഓപ്പറേഷന്‍ നടക്കുന്നതെന്ന് വ്യക്തമാക്കുകയായിരുന്നു.

വെടിവയ്പ്പ് ദോഡ-ഉധംപൂര്‍ അതിര്‍ത്തിയില്‍ പുരോഗമിക്കുകയാണെന്ന് വൈറ്റ് നൈറ്റ് കോര്‍പ്‌സ് എക്‌സില്‍ കുറിച്ചു. 'തീവ്രവാദികളുമായി ഏറ്റുമുട്ടല്‍ നടക്കുന്നു. നിലവിലെ ഓപ്പറേഷന്‍ നടക്കുന്ന സ്ഥലം ദോഡ-ഉധംപുര്‍ അതിര്‍ത്തിയാണ്. ഓപ്പറേഷന്‍ തുടരുന്നു.'

ഡൂഡു ബസന്ത്ഗഡ് മലനിരകളില്‍ തീവ്രവാദികളുമായി സുരക്ഷാ സേന ഏറ്റുമുട്ടി. നിര്‍ദ്ദിഷ്ട വിവരങ്ങളുടെ അടിസ്ഥാനത്തില്‍, സൈന്യവും സ്‌പെഷ്യല്‍ ഓപ്പറേഷന്‍സ് ഗ്രൂപ്പും (എസ്ഒജി), പോലീസും സംയുക്തമായി ഒരു ഓപ്പറേഷന്‍ ആരംഭിക്കുകയും ഇത് വെടിവയ്പ്പില്‍ കലാശിക്കുകയും ചെയ്തു. വെടിവയ്പ്പില്‍ ഒരു സൈനികന് പരിക്കേറ്റു.

'ഏറ്റുമുട്ടല്‍ പുരോഗമിക്കുകയാണ്. എസ്ഒജി, പോലീസ്, ഇന്ത്യന്‍ സൈന്യം എന്നിവരടങ്ങുന്ന സംയുക്ത സംഘം സ്ഥലത്തുണ്ട്.' ജമ്മു ഐജിപി കുറിച്ചു.