ഉന്നാവോ കേസ്: കുൽദീപ് സിംഗ് സെംഗറിന്റെ അപ്പീൽ മൂന്ന് മാസത്തിനുള്ളിൽ തീർപ്പാക്കാൻ സുപ്രീം കോടതി നിർദ്ദേശം

ഡല്‍ഹി: ഉന്നാവോ പീഡനത്തിനിരയായ പെണ്‍കുട്ടിയുടെ പിതാവ് കസ്റ്റഡിയില്‍ മരിച്ച കേസില്‍ ശിക്ഷിക്കപ്പെട്ട മുന്‍ ഉത്തര്‍പ്രദേശ് എംഎല്‍എ കുല്‍ദീപ് സിംഗ് സെംഗറിന്റെ അപ്പീലില്‍ എത്രയും വേഗം തീരുമാനമെടുക്കാന്‍ സുപ്രീം കോടതി നിര്‍ദ്ദേശിച്ചു.

ദില്ലി ഹൈക്കോടതി ഈ അപ്പീല്‍ മുന്‍ഗണനാടിസ്ഥാനത്തില്‍ പരിഗണിക്കണമെന്നും മൂന്ന് മാസത്തിനുള്ളില്‍ വിധി പറയണമെന്നും ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് ഉത്തരവിട്ടു.

സെംഗറിന്റെ 10 വര്‍ഷത്തെ തടവ് ശിക്ഷ വര്‍ദ്ധിപ്പിക്കണമെന്ന് ആവശ്യപ്പെട്ട് ഇരയുടെ കുടുംബം നല്‍കിയ അപ്പീലും ഇതോടൊപ്പം തന്നെ കേള്‍ക്കാന്‍ കോടതി നിര്‍ദ്ദേശിച്ചു. സെംഗറിന്റെ കുറ്റം ഐപിസി 304-ല്‍ (കൊലപാതകമല്ലാത്ത നരഹത്യ) നിന്ന് 302-ലേക്ക് (കൊലപാതകം) മാറ്റണമെന്നാണ് ഇരയുടെ അഭിഭാഷകന്‍ ആവശ്യപ്പെട്ടത്.

10 വര്‍ഷത്തെ ശിക്ഷയില്‍ താന്‍ ഇതിനകം 7 വര്‍ഷവും 7 മാസവും അനുഭവിച്ചു കഴിഞ്ഞുവെന്നും അതിനാല്‍ ശിക്ഷ മരവിപ്പിക്കണമെന്നുമുള്ള സെംഗറിന്റെ വാദം കോടതി അംഗീകരിച്ചില്ല. മറ്റൊരു കേസില്‍ (പീഡനക്കേസ്) സെംഗര്‍ ജീവപര്യന്തം ശിക്ഷ അനുഭവിക്കുകയാണെന്ന കാര്യം ശിക്ഷ മരവിപ്പിക്കുന്നതിനെ തടയുന്ന പ്രസക്തമായ ഘടകമാണെന്ന് ജസ്റ്റിസ് ജോയ്മാല്യ ബാഗ്ചി നിരീക്ഷിച്ചു.

കേസിനെക്കുറിച്ച് മാധ്യമങ്ങളോട് സംസാരിച്ച ഇരയുടെ അഭിഭാഷകന്‍ മഹ്‌മൂദ് പ്രാച്ചയെ ചീഫ് ജസ്റ്റിസ് രൂക്ഷമായി വിമര്‍ശിച്ചു. കേസില്‍ നടക്കുന്ന 'മീഡിയ ട്രയലിനെ' താന്‍ അംഗീകരിക്കുന്നില്ലെന്നും ഒരു അഭിഭാഷകന്‍ എന്ന നിലയില്‍ മാധ്യമങ്ങളെ കാണുന്നത് ശരിയല്ലെന്നും ചീഫ് ജസ്റ്റിസ് വ്യക്തമാക്കി.

സിബിഐക്ക് വേണ്ടി സോളിസിറ്റര്‍ ജനറല്‍ തുഷാര്‍ മേത്ത ഹാജരായി. കേസിന്റെ പ്രധാന അപ്പീല്‍ 2026 ഫെബ്രുവരി 11-ന് ഹൈക്കോടതി പരിഗണിക്കും.