പറന്നുയർന്ന ഉടനെ നിയന്ത്രണം നഷ്ടപ്പെട്ട സ്വകാര്യ വിമാനം യുപിയിൽ തകർന്നു വീണു; പൈലറ്റുമാരും യാത്രക്കാരും സുരക്ഷിതർ

ഡല്‍ഹി: ഉത്തര്‍പ്രദേശിലെ ഫറൂഖാബാദില്‍ വ്യാഴാഴ്ച ഒരു സ്വകാര്യ വിമാനം പറന്നുയര്‍ന്ന് അല്‍പസമയത്തിനുള്ളില്‍ നിയന്ത്രണം നഷ്ടപ്പെട്ടതിനെ തുടര്‍ന്ന് തകര്‍ന്നുവീണു. സംഭവത്തില്‍ രണ്ട് പൈലറ്റുമാരും യാത്രക്കാരും പരിക്കേല്‍ക്കാതെ രക്ഷപ്പെട്ടു.

ജില്ലാ ഉദ്യോഗസ്ഥര്‍ പറയുന്നതനുസരിച്ച്, ജെറ്റ് സര്‍വീസ് ഏവിയേഷന്‍ പ്രൈവറ്റ് ലിമിറ്റഡിന്റെ ഉടമസ്ഥതയിലുള്ള, വിമാനം പറന്നുയരുന്നതിനിടെ നിയന്ത്രണം നഷ്ടപ്പെട്ട് മുഹമ്മദാബാദ് എയര്‍സ്ട്രിപ്പില്‍ നിന്ന് രാവിലെ 10.30 ഓടെ അടുത്തുള്ള കുറ്റിക്കാട്ടിലേക്ക് മറിഞ്ഞു.

ജില്ലയിലെ വ്യാവസായിക മേഖലയില്‍ നിര്‍മ്മാണത്തിലിരിക്കുന്ന ഒരു ബിയര്‍ ഫാക്ടറിയുടെ മാനേജിംഗ് ഡയറക്ടറെ വഹിച്ചു കൊണ്ട് വിമാനം പുറപ്പെട്ടിരുന്നു. പദ്ധതി സ്ഥലം പരിശോധിക്കാന്‍ അദ്ദേഹം എത്തിയിരുന്നുവെന്ന് ഉദ്യോഗസ്ഥരെ ഉദ്ധരിച്ച് പിടിഐ വാര്‍ത്താ ഏജന്‍സി റിപ്പോര്‍ട്ട് ചെയ്തു.

'നിര്‍മാണത്തിലിരിക്കുന്ന ഒരു ഫാക്ടറിയുടെ എംഡി സഞ്ചരിച്ചിരുന്ന സ്വകാര്യ ജെറ്റ് പറന്നുയരുന്നതിനിടെ നിയന്ത്രണം നഷ്ടപ്പെട്ട് അടുത്തുള്ള കുറ്റിക്കാട്ടിലേക്ക് മറിഞ്ഞു. ഭാഗ്യവശാല്‍, എല്ലാ യാത്രക്കാരും സുരക്ഷിതരാണ്, ആര്‍ക്കും പരിക്കില്ലെന്ന് റിപ്പോര്‍ട്ട് ചെയ്തിട്ടുണ്ട്,' ജില്ലാ മജിസ്‌ട്രേറ്റ് അശുതോഷ് കുമാര്‍ ദ്വിവേദി പറഞ്ഞു.