ഉറുദു ഒരു മതമല്ല, ഒരു ഭാഷ മാത്രം. 'ഹിന്ദി എന്ന വാക്ക് പേർഷ്യൻ പദത്തിൽ നിന്നാണ് വന്നത്': മഹാരാഷ്ട്രയിൽ ഉറുദു സൈൻബോർഡ് ഉപയോഗിക്കുന്നതിനെതിരെ സമർപ്പിച്ച ഹർജിയിൽ സുപ്രീം കോടതി

ഡല്‍ഹി: മഹാരാഷ്ട്രയിലെ ഒരു മുനിസിപ്പല്‍ കോര്‍പ്പറേഷന്‍ സൈന്‍ബോര്‍ഡില്‍ ഉറുദു ഭാഷ ഉപയോഗിക്കുന്നതിനെ ചോദ്യം ചെയ്തുള്ള ഹര്‍ജി സുപ്രീം കോടതി തള്ളി.

ഉറുദുവിനെ മുസ്ലീങ്ങളുടെ ഭാഷയായി കണക്കാക്കുന്നത് യാഥാര്‍ത്ഥ്യത്തില്‍ നിന്നും വൈവിധ്യത്തില്‍ ഏകത്വത്തില്‍ നിന്നുമുള്ള 'ദയനീയമായ അധഃപതന'മാണെന്ന് കോടതി പറഞ്ഞു. ഉറുദു ഒരു മതമല്ല, ഒരു ഭാഷയാണെന്നും സുപ്രീം കോടതി കൂട്ടിച്ചേര്‍ത്തു. 

മഹാരാഷ്ട്രയിലെ അകോള ജില്ലയിലെ പാറ്റൂരിലെ മുന്‍ കൗണ്‍സിലറായ വര്‍ഷതായ് സഞ്ജയ് ബഗാഡെ ഒരു ഉറുദു സൈന്‍ബോര്‍ഡിനെതിരെ കോടതിയെ സമീപിച്ചിരുന്നു. 

മുനിസിപ്പല്‍ കൗണ്‍സിലിന്റെ നെയിംബോര്‍ഡില്‍ മറാത്തിക്കൊപ്പം ഉറുദുവിന്റെയും ഉപയോഗം ചോദ്യം ചെയ്തുള്ള ഒരു ഹര്‍ജി പരിഗണിക്കുകയായിരുന്നു ജസ്റ്റിസ് സുധാന്‍ഷു ധൂലിയ, ജസ്റ്റിസ് കെ വിനോദ് ചന്ദ്രന്‍ എന്നിവരടങ്ങിയ ബെഞ്ച്. 

മുനിസിപ്പല്‍ കോര്‍പ്പറേഷന് മറാത്തിയില്‍ മാത്രമേ അതിന്റെ പ്രവര്‍ത്തനങ്ങള്‍ നടത്താന്‍ കഴിയൂ എന്നും അതില്‍ ഉറുദു ഉപയോഗിക്കുന്നത് അനുവദനീയമല്ലെന്നും ബഗാഡെ വാദിച്ചു. 

കൗണ്‍സില്‍ അവരുടെ ഹര്‍ജി തള്ളിയതിനെത്തുടര്‍ന്ന് ബഗാഡെ ബോംബെ ഹൈക്കോടതിയെ സമീപിച്ചിരുന്നു.

എന്നാല്‍ അവിടെ നിന്നും അവര്‍ക്ക് ആശ്വാസം ലഭിച്ചില്ല. പല താമസക്കാര്‍ക്കും ഉറുദു ഭാഷ മനസ്സിലാകുന്നതിനാല്‍ ഫലപ്രദമായ ആശയവിനിമയത്തിനായി കോര്‍പ്പറേഷന്‍ ഉറുദു ഭാഷ ഉപയോഗിക്കാന്‍ തിരഞ്ഞെടുത്തുവെന്ന് സുപ്രീം കോടതി പറഞ്ഞു.

'ഭാഷ ഒരു സമൂഹത്തിന്റേതാണ്, ഒരു പ്രദേശത്തിന്റേതാണ്, ജനങ്ങളുടേതല്ല; ഒരു മതത്തിന്റേതല്ല. ഭാഷ സംസ്‌കാരമാണ്. ഒരു സമൂഹത്തിന്റെയും അതിലെ ജനങ്ങളുടെയും നാഗരിക മുന്നേറ്റം അളക്കുന്നതിനുള്ള അളവുകോലാണ് ഭാഷ.

ഗംഗാ-ജമുനി തഹ്‌സീബിന്റെ ഏറ്റവും മികച്ച മാതൃകയായ ഉറുദുവിന്റെ കാര്യവും അങ്ങനെ തന്നെ, അല്ലെങ്കില്‍ വടക്കേ ഇന്ത്യയുടെയും മധ്യ ഇന്ത്യയുടെയും സമതലങ്ങളുടെ സംയോജിത സാംസ്‌കാരിക ധാര്‍മ്മികതയായ ഹിന്ദുസ്ഥാനി തഹ്‌സീബിന്റെ കാര്യവും അങ്ങനെ തന്നെ.

 എന്നാല്‍ ഭാഷ പഠനത്തിനുള്ള ഒരു ഉപകരണമായി മാറുന്നതിന് മുമ്പ്, അതിന്റെ ആദ്യകാലവും പ്രാഥമികവുമായ ലക്ഷ്യം എല്ലായ്‌പ്പോഴും ആശയവിനിമയമായിരിക്കും.' സുപ്രീം കോടതി അഭിപ്രായപ്പെട്ടു.

ഉറുദു ഇന്ത്യയില്‍ ജനിച്ച ഒരു ഇന്തോ-ആര്യന്‍ ഭാഷയാണെന്ന് സുപ്രീം കോടതി വ്യക്തമാക്കി, അത് രാജ്യത്തിന് അന്യമാണെന്ന ധാരണ തള്ളിക്കളഞ്ഞു.

'ഉറുദു വാക്കുകളോ ഉറുദുവില്‍ നിന്ന് ഉരുത്തിരിഞ്ഞ വാക്കുകളോ ഉപയോഗിക്കാതെ ഹിന്ദിയില്‍ ദൈനംദിന സംഭാഷണം നടത്താന്‍ കഴിയില്ലെന്ന് പറയുന്നത് തെറ്റല്ല. 'ഹിന്ദി' എന്ന വാക്ക് തന്നെ പേര്‍ഷ്യന്‍ പദമായ 'ഹിന്ദവി'യില്‍ നിന്നാണ് ഉണ്ടായതെന്നും കോടതി പറയുന്നു.