ഡെങ്കിപ്പനി വാക്സിൻ ഉടൻ; ഇന്ത്യയിൽ അവസാനഘട്ട പരീക്ഷണങ്ങൾ പുരോഗമിക്കുന്നു

ഡല്‍ഹി: ലോകമെമ്പാടും ഡെങ്കിപ്പനി പടരുന്ന സാഹചര്യത്തില്‍, ഇന്ത്യ വികസിപ്പിച്ചെടുത്ത വാക്‌സിന്‍ അവസാനഘട്ട പരീക്ഷണങ്ങളിലേക്ക് കടന്നു. വിജയിക്കുകയാണെങ്കില്‍, ലോകത്തിലെ തന്നെ ആദ്യത്തെ സിംഗിള്‍ ഡോസ് (ഒറ്റത്തവണ മാത്രം എടുക്കേണ്ട) ഡെങ്കി വാക്‌സിനുകളിലൊന്നായി ഇത് മാറും.

പാനേഷ്യ ബയോടെക് വികസിപ്പിച്ചെടുത്ത ഈ വാക്‌സിന്‍ കഴിഞ്ഞ 15 വര്‍ഷമായി പരീക്ഷണ ഘട്ടത്തിലായിരുന്നു.

നിലവില്‍ ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ചിന്റെ മേല്‍നോട്ടത്തില്‍ രാജ്യത്തുടനീളം 10,000-ത്തിലധികം സന്നദ്ധപ്രവര്‍ത്തകര്‍ക്കിടയില്‍ മൂന്നാം ഘട്ട പരീക്ഷണങ്ങള്‍ നടക്കുകയാണ്. ഈ വര്‍ഷം പരീക്ഷണ ഫലങ്ങള്‍ പുറത്തുവരുന്നതോടെ അടുത്ത വര്‍ഷം മുതല്‍ വാക്‌സിന്‍ വിതരണത്തിന് തയ്യാറായേക്കും.

ആഗോളതാപനവും മാറുന്ന മഴയുടെ രീതിയും ഡെങ്കി പരത്തുന്ന ഈഡിസ് കൊതുകുകളുടെ വംശവര്‍ദ്ധനവിന് അനുകൂല സാഹചര്യമൊരുക്കുന്നു.

ലോകാരോഗ്യ സംഘടനയുടെ കണക്കനുസരിച്ച്, ലോകജനസംഖ്യയുടെ പകുതിയോളം പേര്‍ ഡെങ്കി ഭീഷണിയിലാണ്. ഇന്ത്യയില്‍ മാത്രം 2021 മുതല്‍ പത്ത് ലക്ഷത്തിലധികം കേസുകളും 1,500-ഓളം മരണങ്ങളും റിപ്പോര്‍ട്ട് ചെയ്തിട്ടുണ്ട്. കുട്ടികളെയാണ് ഡെങ്കിപ്പനി ഏറ്റവും ഗുരുതരമായി ബാധിക്കുന്നത്.

നിലവില്‍ ലോകത്തിന്റെ ചില ഭാഗങ്ങളില്‍ ലഭ്യമായ ഡെങ്കി വാക്‌സിനുകള്‍ ഒന്നിലധികം ഡോസുകള്‍ എടുക്കേണ്ടവയാണ്. ജപ്പാനിലെ ടകെഡ നിര്‍മ്മിക്കുന്ന 'ക്യുഡെംഗ' മൂന്ന് മാസത്തെ ഇടവേളയില്‍ രണ്ട് ഡോസുകള്‍ എടുക്കേണ്ടതുണ്ട്.

എന്നാല്‍ പാനേഷ്യയുടെ വാക്‌സിന്‍ ഒറ്റ ഡോസില്‍ പ്രതിരോധം നല്‍കാന്‍ ലക്ഷ്യമിടുന്നു. ഒന്ന് മുതല്‍ 60 വയസ്സ് വരെയുള്ളവര്‍ക്ക് ഇത് ഉപയോഗിക്കാന്‍ കഴിയുമെന്നാണ് കമ്പനി അവകാശപ്പെടുന്നത്.

ഡെങ്കിപ്പനിയുടെ നാലും വകഭേദങ്ങള്‍ക്കെതിരെ സംരക്ഷണം നല്‍കുക എന്നത് ശാസ്ത്രലോകത്തിന് വലിയ വെല്ലുവിളിയായിരുന്നു. 'മൂന്നാം ഘട്ട പരീക്ഷണ ഫലങ്ങള്‍ വന്നാലേ വാക്‌സിന്‍ എത്രത്തോളം സുരക്ഷിതമാണെന്ന് ഉറപ്പിക്കാന്‍ കഴിയൂ. എങ്കിലും ഇത് ഭാവിയിലേക്കുള്ള വലിയൊരു പ്രതീക്ഷയാണ്,' എന്ന് പ്രമുഖ വൈറോളജിസ്റ്റ് ഷാഹിദ് ജമീല്‍ പറഞ്ഞു.