ഔദ്യോഗിക ചടങ്ങുകളിൽ വന്ദേമാതരം നിർബന്ധം: പുതിയ മാർഗ്ഗരേഖ പുറത്തിറക്കി കേന്ദ്ര സർക്കാർ

ഡല്‍ഹി: ഇനി മുതല്‍ രാജ്യത്തെ ഔദ്യോഗിക ചടങ്ങുകളിലും സര്‍ക്കാര്‍ പരിപാടികളിലും വന്ദേമാതരം ആലപിക്കുന്നത് നിര്‍ബന്ധമാക്കി കേന്ദ്ര സര്‍ക്കാര്‍ ഉത്തരവിട്ടു. മൂന്ന് മിനിറ്റും പത്ത് സെക്കന്‍ഡും ദൈര്‍ഘ്യമുള്ള, ആറ് ചരണങ്ങളടങ്ങിയ വന്ദേമാതരമാണ് ആലപിക്കേണ്ടതെന്ന് സര്‍ക്കാര്‍ പുറത്തിറക്കിയ പുതിയ മാര്‍ഗ്ഗരേഖയില്‍ വ്യക്തമാക്കുന്നു.

ദേശീയ പതാക ഉയര്‍ത്തുമ്പോഴും രാഷ്ട്രപതി ഔദ്യോഗിക ചടങ്ങുകളില്‍ എത്തുമ്പോഴും വന്ദേമാതരം ആലപിക്കണം. രാഷ്ട്രപതി രാഷ്ട്രത്തെ അഭിസംബോധന ചെയ്യുന്നതിന് മുന്‍പും ശേഷവും ഗാനം ആലപിക്കുന്നത് നിര്‍ബന്ധമാണ്.

സംസ്ഥാന ഗവര്‍ണര്‍മാര്‍ പങ്കെടുക്കുന്ന ഔദ്യോഗിക പരിപാടികള്‍ക്കും ഈ നിയമം ബാധകമാണ്. അവരുടെ ആഗമന സമയത്തും പ്രസംഗത്തിന് മുന്‍പും പിന്‍പും ഗാനം ആലപിക്കണം.

എല്ലാ സര്‍ക്കാര്‍ സ്ഥാപനങ്ങളിലും ഔദ്യോഗിക ചടങ്ങുകളിലും ഒരേ രീതിയിലുള്ള പ്രോട്ടോക്കോള്‍ പാലിക്കുന്നുണ്ടെന്ന് ഉറപ്പുവരുത്താനാണ് ഈ നീക്കമെന്ന് ഉദ്യോഗസ്ഥര്‍ അറിയിച്ചു.

ഗാനത്തിന്റെ അംഗീകൃത പതിപ്പിനെക്കുറിച്ചും അതിന്റെ സമയക്രമത്തെക്കുറിച്ചും വ്യക്തമാക്കുന്ന വിശദമായ മാര്‍ഗ്ഗനിര്‍ദ്ദേശങ്ങള്‍ ബന്ധപ്പെട്ട അധികാരികള്‍ക്ക് കൈമാറിക്കഴിഞ്ഞു.

രാജ്യത്തെ എല്ലാ സര്‍ക്കാര്‍ സ്ഥാപനങ്ങളും ഈ നിര്‍ദ്ദേശങ്ങള്‍ കര്‍ശനമായി പാലിക്കണമെന്ന് ഉത്തരവില്‍ പറയുന്നു.