എന്തെങ്കിലും സംഭവിക്കണമെങ്കില്‍ ആദ്യം വീടിന് പുറത്തിറങ്ങണം. ഒരു കോഴിയെ പിടിക്കാന്‍ വീടിന്റെ മേല്‍ക്കൂരയില്‍ പോലും കയറാന്‍ കഴിയാത്തവര്‍ വൈകുണ്ഠം തൊടാന്‍ ആഗ്രഹിക്കരുത്. വിജയ് വെറും തുടക്കക്കാരൻ, ഒരു സീറ്റ് പോലും കിട്ടില്ല; തമിഴ്നാട് ബിജെപി അധ്യക്ഷന്റെ പരിഹാസം

ചെന്നൈ: വരാനിരിക്കുന്ന തമിഴ്‌നാട് നിയമസഭാ തിരഞ്ഞെടുപ്പില്‍ ഭരണകക്ഷിയായ ഡിഎംകെയുടെ ഏക എതിരാളി താനാണെന്ന നടന്‍ വിജയിന്റെ അവകാശവാദത്തെ തള്ളി ബിജെപി രംഗത്ത്.

തമിഴ്‌നാട് ബിജെപി അധ്യക്ഷന്‍ നൈനാര്‍ നാഗേന്ദ്രനാണ് തമിഴക വെട്രി കഴകം (ടിവികെ) അധ്യക്ഷന്‍ വിജയിനെ രൂക്ഷമായി പരിഹസിച്ചത്. വിജയ് രാഷ്ട്രീയത്തില്‍ തീര്‍ത്തും അനുഭവപരിചയമില്ലാത്ത വ്യക്തിയാണെന്ന് അദ്ദേഹം കുറ്റപ്പെടുത്തി.

'വീടിന് പുറത്തിറങ്ങൂ': എന്തെങ്കിലും സംഭവിക്കണമെങ്കില്‍ വിജയ് ആദ്യം വീടിന് പുറത്തിറങ്ങണം. ഒരു കോഴിയെ പിടിക്കാന്‍ വീടിന്റെ മേല്‍ക്കൂരയില്‍ പോലും കയറാന്‍ കഴിയാത്തവര്‍ വൈകുണ്ഠം തൊടാന്‍ ആഗ്രഹിക്കരുത്. ടിവികെ ഒരു വോട്ടുപോലും നേടില്ലെന്നും ഒരു സീറ്റില്‍ പോലും വിജയിക്കില്ലെന്നും നാഗേന്ദ്രന്‍ അവകാശപ്പെട്ടു.

വെറുമൊരു നടനായതുകൊണ്ട് മാത്രം 32% വോട്ട് കിട്ടുമെന്ന് എങ്ങനെ പറയാനാകും? ഹനുമാനെപ്പോലെ മല ചാടിക്കടക്കുമെന്ന് ആര്‍ക്കും അവകാശപ്പെടാം, പക്ഷേ രാഷ്ട്രീയത്തില്‍ അതിന് പ്രായോഗികത വേണമെന്ന് അദ്ദേഹം ഓര്‍മ്മിപ്പിച്ചു.

2026-ലെ നിയമസഭാ തിരഞ്ഞെടുപ്പില്‍ ടിവികെ 30 ശതമാനത്തിലധികം വോട്ട് വിഹിതം നേടുമെന്ന് പാര്‍ട്ടി നടത്തിയ ആഭ്യന്തര സര്‍വ്വേകള്‍ അവകാശപ്പെട്ടിരുന്നു. ഡിഎംകെ 32.9 ശതമാനവും വിജയിന്റെ പാര്‍ട്ടി 31.7 ശതമാനവും വോട്ട് നേടുമെന്നാണ് ഈ സര്‍വ്വേ പറയുന്നത്. എന്നാല്‍ ഇത്തരം കണക്കുകള്‍ വെറും ആത്മവിശ്വാസം മാത്രമാണെന്നാണ് ബിജെപിയുടെ നിലപാട്.

കഴിഞ്ഞ വെള്ളിയാഴ്ച സേലത്ത് നടന്ന റാലിയില്‍ തമിഴക വെട്രി കഴകം ഒറ്റയ്ക്ക് മത്സരിച്ച് അധികാരത്തിലെത്തുമെന്ന് വിജയ് ആവര്‍ത്തിച്ചു. ഇന്ത്യ മുന്നണിയുമായോ ബിജെപി നയിക്കുന്ന എന്‍ഡിഎയുമായോ തിരഞ്ഞെടുപ്പിന് മുന്‍പോ ശേഷമോ സഖ്യത്തിനില്ലെന്ന് വിജയ് വ്യക്തമാക്കി.

ടിവികെ തമിഴ്നാട്ടില്‍ പൂര്‍ണ്ണ ഭൂരിപക്ഷത്തോടെ സര്‍ക്കാര്‍ രൂപീകരിക്കുമെന്നാണ് തന്റെ ഉറച്ച വിശ്വാസമെന്നും ഒരു സ്വകാര്യ അഭിമുഖത്തില്‍ വിജയ് പറഞ്ഞു.