മുൻ പ്രധാനമന്ത്രി മൻമോഹൻ സിങ്ങിനെ തിരഞ്ഞെടുപ്പിൽ പരാജയപ്പെടുത്തിയ വി കെ മൽഹോത്ര അന്തരിച്ചു

ഡല്‍ഹി: മുതിര്‍ന്ന ഭാരതീയ ജനതാ പാര്‍ട്ടി നേതാവും ഡല്‍ഹി ബിജെപിയുടെ ആദ്യ പ്രസിഡന്റുമായ പ്രൊഫ. വിജയ് കുമാര്‍ മല്‍ഹോത്ര അന്തരിച്ചു. 94 വയസ്സായിരുന്നു. കഴിഞ്ഞ കുറച്ച് ദിവസങ്ങളായി ഡല്‍ഹി എയിംസില്‍ ചികിത്സയിലായിരുന്ന അദ്ദേഹം ഇന്ന് രാവിലെ 6 മണിയോടെയാണ് അന്തരിച്ചത്.

ഡല്‍ഹി ബിജെപിയുടെ നിലവിലെ പ്രസിഡന്റ് വീരേന്ദ്ര സച്ച്‌ദേവയും മറ്റ് നേതാക്കളും അനുശോചനം രേഖപ്പെടുത്തി. അടല്‍ ബിഹാരി വാജ്പേയി, ലാല്‍ കൃഷ്ണ അദ്വാനി എന്നിവരോടൊപ്പം മല്‍ഹോത്ര ആര്‍എസ്എസ് വിട്ട് ജനസംഘത്തിലൂടെയാണ് രാഷ്ട്രീയത്തിലേക്ക് പ്രവേശിച്ചത്. ഡല്‍ഹിയില്‍ ആര്‍എസ്എസ് പ്രത്യയശാസ്ത്രം വികസിപ്പിക്കുന്നതിനായി ജനസംഘത്തോടൊപ്പം മല്‍ഹോത്ര വിപുലമായി പ്രവര്‍ത്തിച്ചു.

1931 ഡിസംബര്‍ 3 ന് ലാഹോറിലാണ് മല്‍ഹോത്ര ജനിച്ചത്. കവിരാജ് ഖജന്‍ ചന്ദിന്റെ ഏഴ് മക്കളില്‍ നാലാമനായിരുന്നു അദ്ദേഹം. ഇന്ത്യന്‍ രാഷ്ട്രീയക്കാരനും കായിക ഭരണാധികാരിയുമായാണ് മല്‍ഹോത്ര ഏറ്റവും കൂടുതല്‍ ഓര്‍മ്മിക്കപ്പെടുന്നത്.

ഡല്‍ഹി പ്രദേശ് ജനസംഘത്തിന്റെ പ്രസിഡന്റായും (197275) രണ്ടുതവണ ഡല്‍ഹി ബിജെപിയുടെ സംസ്ഥാന പ്രസിഡന്റായും (197780, 198084) മല്‍ഹോത്ര തിരഞ്ഞെടുക്കപ്പെട്ടു. 

സജീവ രാഷ്ട്രീയത്തില്‍ ദീര്‍ഘകാലം പ്രവര്‍ത്തിച്ച വ്യക്തിയായിരുന്നു മല്‍ഹോത്ര. കേദാര്‍ നാഥ് സാഹ്നി, മദന്‍ ലാല്‍ ഖുറാന എന്നിവര്‍ക്കൊപ്പം ഡല്‍ഹിയില്‍ ബിജെപിയെ വര്‍ഷങ്ങളോളം നിലനിര്‍ത്തിയതിന്റെ ബഹുമതി അദ്ദേഹത്തിനുണ്ട്.

1999 ലെ ലോക്സഭാ തെരഞ്ഞെടുപ്പില്‍ സൗത്ത് ഡല്‍ഹി സീറ്റില്‍ നിന്ന് മുന്‍ പ്രധാനമന്ത്രി മന്‍മോഹന്‍ സിങ്ങിനെ വന്‍ ഭൂരിപക്ഷത്തില്‍ പരാജയപ്പെടുത്തിയതാണ് അദ്ദേഹത്തിന്റെ ഏറ്റവും വലിയ രാഷ്ട്രീയ വിജയമായി കണക്കാക്കപ്പെടുന്നത്.

കഴിഞ്ഞ 45 വര്‍ഷത്തിനിടെ ഡല്‍ഹിയില്‍ നിന്ന് അഞ്ച് തവണ എംപിയായും രണ്ട് തവണ എംഎല്‍എയായും മല്‍ഹോത്ര സേവനമനുഷ്ഠിച്ചിട്ടുണ്ട്. 2004 ലെ പൊതുതെരഞ്ഞെടുപ്പില്‍ ഡല്‍ഹിയില്‍ വിജയിച്ച ഏക ബിജെപി സ്ഥാനാര്‍ത്ഥിയായിരുന്നു മല്‍ഹോത്ര.

തന്റെ കരിയറില്‍ ഉടനീളം, മല്‍ഹോത്ര തന്റെ ക്ലീന്‍ ഇമേജും കളങ്കമില്ലാത്ത ഇമേജും നിലനിര്‍ത്തി. ഹിന്ദി സാഹിത്യത്തില്‍ ഡോക്ടറേറ്റ് നേടിയിട്ടുണ്ട്. രാഷ്ട്രീയ, സാമൂഹിക പ്രവര്‍ത്തനങ്ങള്‍ക്ക് പുറമേ, ഡല്‍ഹിയിലെ ചെസ്സ്, അമ്പെയ്ത്ത് ക്ലബ്ബുകളുടെ ഭരണത്തിലും അദ്ദേഹം പങ്കാളിയായിരുന്നു.