ഇൻഡോറിൽ ജലമലിനീകരണം: ആറുമാസം പ്രായമുള്ള കുഞ്ഞ് മരിച്ചു, '10 വർഷത്തെ പ്രാർത്ഥനയ്ക്ക് ശേഷമാണ് കുഞ്ഞ് ജനിച്ചതെന്ന്' അമ്മ

ഡല്‍ഹി: മധ്യപ്രദേശിലെ ഇന്‍ഡോറിലെ ഭഗീരത്പുര പ്രദേശത്തെ മറാത്തി മൊഹല്ലയില്‍ ആറ് മാസം പ്രായമുള്ള കുഞ്ഞ് മലിനമായ വെള്ളം കുടിച്ച് മരിച്ചതായി ആരോപണം. ഇത് നിവാസികള്‍ക്കിടയില്‍ പ്രതിഷേധത്തിന് കാരണമായി.

വീട്ടില്‍ നിന്നുള്ള വെള്ളവും പാലും കുടിച്ച കുഞ്ഞിന് കടുത്ത ഛര്‍ദ്ദിയും വയറിളക്കവും ഉണ്ടായതായി കുട്ടിയുടെ അമ്മ സാധന സാഹു പറഞ്ഞു. ആദ്യം സര്‍ക്കാര്‍ ആശുപത്രിയിലേക്ക് കൊണ്ടുപോയി, പിന്നീട് സ്വകാര്യ ആശുപത്രിയിലേക്ക് മാറ്റി, അവിടെ വെച്ച് ഡോക്ടര്‍മാര്‍ മരിച്ചതായി പ്രഖ്യാപിച്ചു.

'എന്റെ കുട്ടി പോയി... ഇനിയും എത്ര നിരപരാധികളുടെ ജീവന്‍ നഷ്ടപ്പെടുമെന്ന് ആര്‍ക്കറിയാം,' പത്ത് വര്‍ഷത്തെ നീണ്ട പ്രാര്‍ത്ഥനയ്ക്ക് ശേഷമാണ് കുട്ടി ജനിച്ചതെന്ന് അമ്മ പറഞ്ഞു. ആവര്‍ത്തിച്ചുള്ള പരാതികള്‍ ഉണ്ടായിരുന്നിട്ടും, 'വൃത്തികെട്ട കനാലിലെ വെള്ളം' പ്രദേശത്തേക്ക് വിതരണം ചെയ്തിട്ടുണ്ടെന്ന് അവര്‍ ആരോപിച്ചു.

തന്റെ 10 വയസ്സുള്ള മകള്‍ ഇപ്പോള്‍ വയറുവേദനയെക്കുറിച്ച് പരാതിപ്പെടാന്‍ തുടങ്ങിയിട്ടുണ്ടെന്നും മലിനമായ വെള്ളവുമായി ഇതിന് ബന്ധമുണ്ടെന്ന് കുടുംബം വിശ്വസിക്കുന്നുണ്ടെന്നും സാഹു പറഞ്ഞു.