വിദിഷയിൽ വിവാഹ പാർട്ടി സഞ്ചരിച്ചിരുന്ന വാഹനം മറിഞ്ഞു, നാലു പേർ മരിച്ചു, 12 പേർക്ക് പരിക്ക്; മരിച്ചവരുടെ കുടുംബങ്ങൾക്ക് രണ്ട് ലക്ഷം രൂപ ധനസഹായം നൽകുമെന്ന് മുഖ്യമന്ത്രി

ഭോപ്പാല്‍: മധ്യപ്രദേശിലെ വിദിഷ ജില്ലയിലെ ലതേരി തഹസില്‍ പ്രദേശത്ത് വിവാഹ പാര്‍ട്ടി സഞ്ചരിച്ചിരുന്ന വാഹനം നിയന്ത്രണം വിട്ട് മറിഞ്ഞു. നാലു പേര്‍ മരിക്കുകയും 12 പേര്‍ക്ക് പരിക്കേല്‍ക്കുകയും ചെയ്തു. രാത്രി 10 മണിയോടെയാണ് സംഭവം നടന്നത്.

വ്യാഴാഴ്ച രാത്രി പത്ത് മണിയോടെ മഡഗന്‍ വാലിയിലാണ് അപകടം നടന്നത്. വാഹനം ഇന്‍ഡോറില്‍ നിന്ന് സിറോജിലേക്ക് പോവുകയായിരുന്നു എന്നാണ് വിവരം. കൊല്ലപ്പെട്ടവരില്‍ ഒരാള്‍ സ്ത്രീയാണെന്ന് അധികൃതര്‍ സ്ഥിരീകരിച്ചു, പരിക്കേറ്റവരില്‍ അഞ്ച് പേരുടെ നില ഗുരുതരമാണ്.

സിറോജിലെ ജടാശങ്കറിന് സമീപമുള്ള ഒരു ചടങ്ങിന് ശേഷം ഇന്‍ഡോറിലെ ഔലിഖേദ ഗ്രാമത്തിലേക്ക് വിവാഹ ഘോഷയാത്ര മടങ്ങുകയായിരുന്നു.

16 യാത്രക്കാരുമായി ഒരു പിക്കപ്പ് ട്രക്കിലായിരുന്നു വിവാഹ സംഘം സഞ്ചരിച്ചിരുന്നത്. പുരുഷന്മാരും സ്ത്രീകളും കുട്ടികളുമാണ് ട്രക്കില്‍ യാത്ര ചെയ്തിരുന്നത്.

സിറോജ് പട്ടണത്തിന് സമീപം വാഹനം നിയന്ത്രണം വിട്ട് മറിയുകയായിരുന്നുവെന്ന് പോലീസ് ഉദ്യോഗസ്ഥര്‍ പറഞ്ഞു. നാല് പേരുടെ മരണത്തില്‍ മുഖ്യമന്ത്രി മോഹന്‍ യാദവ് അഗാധമായ ദുഃഖം രേഖപ്പെടുത്തി. മരിച്ചവരുടെ കുടുംബങ്ങള്‍ക്കും പരിക്കേറ്റവര്‍ക്കും സാമ്പത്തിക സഹായം വാഗ്ദാനം ചെയ്തു.