ജമ്മു കശ്മീര്‍ നിയന്ത്രണ വിധേയമായിട്ടില്ലെന്ന സന്ദേശം നല്‍കാനാണ് അവര്‍ ശ്രമിക്കുന്നത്; ജമ്മുവില്‍ വര്‍ദ്ധിച്ചുവരുന്ന ഭീകരാക്രമണത്തിന് പിന്നിലെ കാരണം വിശദീകരിച്ച് വിദഗ്ധര്‍

ഡല്‍ഹി: ജമ്മു കശ്മീരില്‍ അടുത്തിടെയുണ്ടായ ഭീകരാക്രമണങ്ങളുടെ പശ്ചാത്തലത്തില്‍ സുരക്ഷാ സേന അതീവ ജാഗ്രതയിലാണ്. കഴിഞ്ഞ കുറച്ച് ദിവസങ്ങളായി റിയാസി, കത്വ, ദോഡ ജില്ലകളില്‍ ഭീകരര്‍ നടത്തിയ ആക്രമണത്തില്‍ ഏഴ് തീര്‍ത്ഥാടകരും ഒരു സിആര്‍പിഎഫ് ജവാനും ഉള്‍പ്പെടെ ഒമ്പത് പേര്‍ കൊല്ലപ്പെടുകയും ഏഴ് സുരക്ഷാ ഉദ്യോഗസ്ഥര്‍ക്കും മറ്റുള്ളവര്‍ക്കും പരിക്കേല്‍ക്കുകയും ചെയ്തിരുന്നു.

പ്രധാനമന്ത്രി നരേന്ദ്ര മോദിയുടെ സത്യപ്രതിജ്ഞാ ചടങ്ങ് നടന്ന ജൂണ്‍ 9 ന് റിയാസിയില്‍ അജ്ഞാതരായ ഭീകരര്‍ ബസിനുനേരെ നടത്തിയ വെടിവയ്പ്പില്‍ 10 പേര്‍ കൊല്ലപ്പെടുകയും 33 പേര്‍ക്ക് പരിക്കേല്‍ക്കുകയും ചെയ്തു. സമീപകാലത്ത് ജമ്മുവില്‍ ഭീകരാക്രമണ സംഭവങ്ങള്‍ ഗണ്യമായി വര്‍ദ്ധിച്ചിട്ടുണ്ട്.

പ്രധാനമന്ത്രി മോദിയും എന്‍ഡിഎ സര്‍ക്കാരും തങ്ങളുടെ വിജയത്തെക്കുറിച്ച് സംസാരിക്കുമ്പോള്‍ ജമ്മു കശ്മീര്‍ നിയന്ത്രണ വിധേയമായിട്ടില്ലെന്ന സന്ദേശം നല്‍കാനാണ് തീര്‍ഥാടകര്‍ സഞ്ചരിച്ചിരുന്ന ബസിനു നേരെ ഭീകരര്‍ ആക്രമണം നടത്തിയതെന്ന് ലെഫ്റ്റനന്റ് ജനറല്‍ സയ്യിദ് അത് ഹസ്നൈന്‍ (റിട്ട) പറഞ്ഞു.

തങ്ങള്‍ ഇപ്പോഴും പ്രദേശത്തിന്റെ നിയന്ത്രണത്തിലാണ് എന്ന സന്ദേശം നല്‍കാനാണ് ഭീകരര്‍ ഇത്തരം ആക്രമണങ്ങള്‍ നടത്തുന്നതെന്ന് ചിട്ടിസിംഗ്പുര കൂട്ടക്കൊലയുടെ ഉദാഹരണം ഉദ്ധരിച്ച് ഹസ്നൈന്‍ പറഞ്ഞു.

2000 മാര്‍ച്ചില്‍ ജമ്മു കശ്മീരിലെ അനന്ത്‌നാഗ് ജില്ലയിലെ ചിത്തിസിംഗ്‌പോറ ഗ്രാമത്തില്‍ 35 സിഖ് തീര്‍ത്ഥാടകരെ പാകിസ്ഥാന്‍ ഭീകരര്‍ വെടിവച്ചു കൊന്നിരുന്നു. അന്നത്തെ അമേരിക്കന്‍ പ്രസിഡന്റ് ബില്‍ ക്ലിന്റണ്‍ ഇന്ത്യന്‍ പാര്‍ലമെന്റിനെ അഭിസംബോധന ചെയ്യുന്നതിന് ഒരു ദിവസം മുമ്പാണ് സംഭവം.

ലോക്സഭാ തിരഞ്ഞെടുപ്പ് വിജയകരമായി പൂര്‍ത്തിയാക്കിയതിന് ശേഷം എന്തെങ്കിലും ചെയ്യാന്‍ പാകിസ്ഥാന്‍ വ്യഗ്രത കാണിക്കുകയാണെന്ന് സുരക്ഷാ നിരീക്ഷകനായ സുശാന്ത് സരീന്‍ പറഞ്ഞു.

സൈന്യത്തിന്റെ വര്‍ധിച്ച ഓപ്പറേഷനിലൂടെ കശ്മീര്‍ താഴ്വരയില്‍ പ്രവര്‍ത്തിക്കാനുള്ള ഇടം കുറഞ്ഞതിനാല്‍ കഴിഞ്ഞ മൂന്ന് വര്‍ഷത്തിനിടെ തീവ്രവാദത്തിന്റെ ഗുരുത്വാകര്‍ഷണ കേന്ദ്രം ജമ്മു പ്രദേശങ്ങളിലേക്ക് മാറിയെന്ന് അദ്ദേഹം പറഞ്ഞു.