ആന്ധ്രാപ്രദേശ് യലമഞ്ചിലിയിൽ ടാറ്റാനഗർ-എറണാകുളം എക്സ്പ്രസ്സിന് തീപിടിച്ചു; ഒരാൾ മരിച്ചു

വിശാഖപട്ടണം: വിശാഖപട്ടണത്ത് നിന്ന് 66 കിലോമീറ്റര്‍ അകലെ ആന്ധ്രാപ്രദേശിലെ യലമഞ്ചിലിയില്‍ ടാറ്റാനഗര്‍-എറണാകുളം എക്‌സ്പ്രസിന്റെ രണ്ട് കമ്പാര്‍ട്ടുമെന്റുകള്‍ക്ക് തീപിടിച്ച് ഒരാള്‍ മരിച്ചു. കൊല്ലപ്പെട്ടത് ചന്ദ്രശേഖര്‍ സുന്ദരം എന്നാണ് തിരിച്ചറിഞ്ഞത്.

പുലര്‍ച്ചെ 12.45 ഓടെയാണ് തീപിടിത്തത്തെക്കുറിച്ച് വിവരം ലഭിച്ചതെന്നും തുടര്‍ന്ന് നിരവധി സംഘങ്ങള്‍ സ്ഥലത്തെത്തിയെന്നും ഉദ്യോഗസ്ഥര്‍ പറഞ്ഞു. തീപിടിത്തമുണ്ടായപ്പോള്‍ രണ്ട് കമ്പാര്‍ട്ടുമെന്റുകളിലുമായി യഥാക്രമം 82 ഉം 76 ഉം യാത്രക്കാരുണ്ടായിരുന്നുവെന്ന് അവര്‍ പറഞ്ഞു. 

പാന്‍ട്രിക്ക് സമീപമുള്ള ബി1 എസി കോച്ചിലാണ് തീപിടിത്തമുണ്ടായതെന്നും അത് തൊട്ടടുത്തുള്ള എം2 കോച്ചിലേക്കും പടര്‍ന്നതായും ഉദ്യോഗസ്ഥര്‍ പറഞ്ഞു. യാത്രക്കാരില്‍ ഒരാള്‍ തീപിടിത്തം ശ്രദ്ധയില്‍പ്പെട്ടതിനെ തുടര്‍ന്ന് അടിയന്തര ചെയിന്‍ വലിച്ച് ട്രെയിന്‍ നിര്‍ത്തിയതായും തുടര്‍ന്ന് ആളുകളെ ഒഴിപ്പിച്ചതായും ഉദ്യോഗസ്ഥര്‍ പറഞ്ഞു.

'ടാറ്റാനഗറില്‍ നിന്ന് എറണാകുളത്തേക്ക് പോകുകയായിരുന്ന ട്രെയിനില്‍ - വിജയവാഡ ഡിവിഷനിലെ യെലമാഞ്ചിലി (വൈഎല്‍എം) സ്റ്റേഷനില്‍ തീപിടുത്തം റിപ്പോര്‍ട്ട് ചെയ്യപ്പെട്ടു. അഗ്‌നിശമന സേന സ്ഥലത്തെത്തി, തീയണയ്ക്കല്‍ പ്രവര്‍ത്തനങ്ങള്‍ നടന്നുവരുന്നു,' സൗത്ത് സെന്‍ട്രല്‍ റെയില്‍വേ അറിയിച്ചു.

സംഭവത്തെത്തുടര്‍ന്ന് ട്രെയിനില്‍ നിന്ന് രണ്ട് കമ്പാര്‍ട്ടുമെന്റുകള്‍ വേര്‍പെടുത്തിയതായി ഉദ്യോഗസ്ഥര്‍ പറഞ്ഞു, തീപിടിത്തത്തിന്റെ കാരണം കണ്ടെത്താന്‍ രണ്ട് ഫോറന്‍സിക് സംഘങ്ങള്‍ സ്ഥലത്തെത്തിയിട്ടുണ്ടെന്നും തകര്‍ന്ന കമ്പാര്‍ട്ടുമെന്റുകളിലെ യാത്രക്കാരെ അവരുടെ ലക്ഷ്യസ്ഥാനങ്ങളിലേക്ക് അയയ്ക്കുന്നതിനുള്ള ക്രമീകരണങ്ങള്‍ ചെയ്യുന്നുണ്ടെന്നും അവര്‍ പറഞ്ഞു.

'നിര്‍ഭാഗ്യവശാല്‍, ബി 1 കോച്ചില്‍ നിന്ന് ഒരു മൃതദേഹം കണ്ടെത്തി,' ഒരു ഉദ്യോഗസ്ഥന്‍ പറഞ്ഞതായി വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്തു.