തലസ്ഥാനത്ത് വീണ്ടും വേഗപ്പാച്ചിൽ: ഡൽഹിയിൽ കാറിടിച്ച് സൊമാറ്റോ ഡെലിവറി എക്സിക്യൂട്ടീവ് കൊല്ലപ്പെട്ടു; ഡ്രൈവർ മദ്യപിച്ചതെന്ന് സൂചന

ഡല്‍ഹി: പടിഞ്ഞാറന്‍ ഡല്‍ഹിയിലെ സുഭാഷ് നഗറില്‍ ശനിയാഴ്ച പുലര്‍ച്ചെയുണ്ടായ വാഹനാപകടത്തില്‍ ഭക്ഷണ വിതരണക്കാരനായ യുവാവ് കൊല്ലപ്പെട്ടു. അമിതവേഗത്തിലെത്തിയ കാര്‍ ഇടിച്ചാണ് സൊമാറ്റോ ഡെലിവറി എക്‌സിക്യൂട്ടീവ് മരിച്ചത്.

ശനിയാഴ്ച പുലര്‍ച്ചെ ഏകദേശം 4.30-ഓടെയാണ് അപകടം നടന്നത്. സുഭാഷ് നഗറിലൂടെ യാത്ര ചെയ്യുകയായിരുന്ന ഡെലിവറി പങ്കാളിയുടെ ബൈക്കിലേക്ക് അമിതവേഗത്തില്‍ വന്ന കാര്‍ ഇടിച്ചു കയറുകയായിരുന്നു. ഇടിയുടെ ആഘാതത്തില്‍ റോഡിലേക്ക് തെറിച്ചു വീണ യുവാവിന് ഗുരുതരമായി പരിക്കേറ്റു.

ഉടന്‍ തന്നെ സമീപത്തെ ആശുപത്രിയില്‍ എത്തിച്ചെങ്കിലും ഇദ്ദേഹം നേരത്തെ തന്നെ മരിച്ചതായി ഡോക്ടര്‍മാര്‍ സ്ഥിരീകരിച്ചു.  അപകടം നടന്ന സമയത്ത് കാര്‍ ഓടിച്ചിരുന്നയാള്‍ മദ്യലഹരിയിലായിരുന്നുവെന്ന് സംഭവസ്ഥലത്തുണ്ടായിരുന്ന ദൃക്‌സാക്ഷികള്‍ ആരോപിച്ചു.

സംഭവസ്ഥലത്തെത്തിയ പോലീസ് അന്വേഷണം ആരംഭിച്ചു. അപകടമുണ്ടാക്കിയ കാര്‍ കണ്ടെത്താനും ഡ്രൈവറെ ചോദ്യം ചെയ്യാനുമുള്ള നടപടികള്‍ പുരോഗമിക്കുകയാണ്. അപകടത്തിന്റെ കൃത്യമായ വിവരങ്ങള്‍ ശേഖരിക്കുന്നതിനായി പ്രദേശത്തെ സിസിടിവി ദൃശ്യങ്ങള്‍ പോലീസ് പരിശോധിച്ചുവരികയാണ്.