ഷെഹ്ബാസ് ഷെരീഫ് "നാടകം കാണുന്ന മാനേജരെപ്പോലെ" പെരുമാറുമ്പോൾ മുനീർ "ഒരു വിൽപ്പനക്കാരനെപ്പോലെ" പെരുമാറുന്നു. ട്രംപിന് അപൂര്‍വ ഭൗമ ധാതുക്കള്‍ സമ്മാനിച്ച പാകിസ്ഥാന്‍ ആര്‍മി ചീഫ് ഫീല്‍ഡ് മാര്‍ഷല്‍ അസിം മുനീറിനെ പരിഹസിച്ച് സ്വന്തം രാജ്യം !

വാഷിംഗ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന് അപൂര്‍വ ഭൗമ ധാതുക്കള്‍ സമ്മാനിച്ചതിന് പാകിസ്ഥാന്‍ ആര്‍മി ചീഫ് ഫീല്‍ഡ് മാര്‍ഷല്‍ അസിം മുനീറിന് സ്വന്തം രാജ്യത്ത് നിന്ന് വിമര്‍ശനം. ഫീല്‍ഡ് മാര്‍ഷലിന്റെ അധികാരത്തെ ഒരു സെനറ്റര്‍ ചോദ്യം ചെയ്യുകയും വിമര്‍ശിക്കുകയും ചെയ്തു. 

പ്രധാനമന്ത്രി ഷെഹ്ബാസ് ഷെരീഫിന്റെ വാഷിംഗ്ടണ്‍ സന്ദര്‍ശന വേളയില്‍ ട്രംപിന് അപൂര്‍വ ഭൂമി ധാതുക്കള്‍ സമ്മാനിച്ചതായി ആരോപിച്ച് പാകിസ്ഥാന്‍ പാര്‍ലമെന്റില്‍ സംസാരിച്ച സെനറ്റര്‍ ഐമല്‍ വാലി ഖാന്‍ മുനീറിനെതിരെ ആഞ്ഞടിച്ചു.

ഷെഹ്ബാസ് ഷെരീഫ് 'നാടകം കാണുന്ന മാനേജരെപ്പോലെ' പെരുമാറുമ്പോള്‍ മുനീര്‍ 'ഒരു വില്‍പ്പനക്കാരനെപ്പോലെ' പെരുമാറുന്നുവെന്ന് അദ്ദേഹം പറഞ്ഞു. 

മുനീര്‍ ട്രംപിന് അപൂര്‍വ ധാതുക്കള്‍ സമ്മാനിച്ചത് എന്ത് അധികാരത്തിന്റെയും അടിസ്ഥാനത്തിന്റെയും പേരിലാണെന്ന് ഖാന്‍ ചോദ്യം ചെയ്തു.

വൈറ്റ് ഹൗസില്‍ യുഎസ് പ്രസിഡന്റിന് ഒരു ബ്രീഫ്കേസില്‍ പാകിസ്ഥാനില്‍ നിന്നുള്ള അപൂര്‍വ ഭൂമി ധാതുക്കള്‍ എന്ന് റിപ്പോര്‍ട്ട് ചെയ്യപ്പെടുന്ന വര്‍ണ്ണാഭമായ കല്ലുകള്‍ മുനീര്‍ നല്‍കുന്ന ഒരു ഫോട്ടോ വൈറലായതിനെ തുടര്‍ന്നാണ് വിവാദം പൊട്ടിപ്പുറപ്പെട്ടത്.

'നമ്മുടെ ചീഫ് ഓഫ് ആര്‍മി സ്റ്റാഫ് അപൂര്‍വ എര്‍ത്ത് ധാതുക്കള്‍ അടങ്ങിയ ബ്രീഫ്‌കേസുമായി ചുറ്റിത്തിരിയുകയാണ്. എന്തൊരു തമാശ! അത് തികഞ്ഞ പരിഹാസമായിരുന്നു. ആ ഫോട്ടോ കണ്ടവരെല്ലാം ചിന്തിച്ചിരുന്നത്, 'ഏത് സൈനിക മേധാവിയാണ് അപൂര്‍വ എര്‍ത്ത് ധാതുക്കള്‍ അടങ്ങിയ ബ്രീഫ്‌കേസ് ചുമന്ന് നടക്കുക' എന്നാണ്.

എനിക്ക് അത് ഒരു വലിയ ബ്രാന്‍ഡഡ് സ്റ്റോറായി തോന്നി - ഒരു കടയുടമ ഒരു ഉപഭോക്താവിനോട് തന്നില്‍ നിന്ന് വലിയ തിളക്കമുള്ള ഒരു സാധനം വാങ്ങാന്‍ പറയുന്നത് ഒരു മാനേജര്‍ സന്തോഷത്തോടെ നോക്കിനിന്നു.'

'ഏത് പദവിയില്‍ ഏത് നിയമത്തിന് കീഴിലാണ്, ഇത് സ്വേച്ഛാധിപത്യമാണ്. ഇത് ജനാധിപത്യമല്ലെന്ന് പറയേണ്ടി വന്നതില്‍ എനിക്ക് ഖേദമുണ്ട്... ഇത് പാര്‍ലമെന്റിനോടുള്ള അവഹേളനമല്ലേ?' അദ്ദേഹം കൂട്ടിച്ചേര്‍ത്തു.