ബഗ്രാം ബേസിലെ യുഎസ് അധിനിവേശത്തിനെതിരെ ഇറാൻ, റഷ്യ, ചൈന, പാകിസ്ഥാൻ എന്നീ രാജ്യങ്ങൾ ഒന്നിച്ചു പ്രതിഷേധിച്ചു, സംയുക്ത പ്രസ്താവന പുറത്തിറക്കി

ഇസ്ലാമാബാദ്: അഫ്ഗാനിസ്ഥാനിലെ ബഗ്രാം സൈനിക താവളം തിരിച്ചുപിടിക്കാനുള്ള ശ്രമങ്ങള്‍ യുഎസ് പ്രസിഡന്റ് ഡൊണാള്‍ഡ് ട്രംപ് ആരംഭിച്ചതുമുതല്‍, മേഖലയിലെ നാല് രാജ്യങ്ങള്‍ പ്രക്ഷുബ്ധാവസ്ഥയിലാണ്.

അഫ്ഗാനിസ്ഥാന്റെ അടുത്ത അയല്‍ക്കാരായ ചൈന, റഷ്യ, ഇറാന്‍, പാകിസ്ഥാന്‍ എന്നിവ തങ്ങളുടെ പ്രദേശത്തിനടുത്ത് ഏതെങ്കിലും സൈനിക താവളം സ്ഥാപിക്കുന്നതിനെതിരെ എതിര്‍പ്പ് ശക്തമാക്കിയിട്ടുണ്ട്.

ഐക്യരാഷ്ട്രസഭയുടെ 80-ാമത് പൊതുസഭയുടെ സമ്മേളനത്തോടനുബന്ധിച്ച് ചൈന, ഇറാന്‍, പാകിസ്ഥാന്‍, റഷ്യ എന്നീ രാജ്യങ്ങളിലെ വിദേശകാര്യ മന്ത്രിമാര്‍ കൂടിക്കാഴ്ച നടത്തി, പാകിസ്ഥാന്‍ വിദേശകാര്യ മന്ത്രാലയം ഒരു സംയുക്ത പ്രസ്താവന പുറത്തിറക്കി.

അഫ്ഗാനിസ്ഥാന്റെ പരമാധികാരം, സ്വാതന്ത്ര്യം, പ്രാദേശിക സമഗ്രത എന്നിവയെ ബഹുമാനിക്കണമെന്ന് നാല് കക്ഷികളും ഊന്നിപ്പറഞ്ഞതായും അഫ്ഗാനിസ്ഥാനിലോ പരിസരത്തോ ഉള്ള ഏതൊരു സൈനിക താവളവും പ്രാദേശിക സമാധാനത്തിനും സുരക്ഷയ്ക്കും ഭീഷണിയാകുമെന്നും പ്രസ്താവനയില്‍ പറയുന്നു.

അഫ്ഗാനിസ്ഥാന്റെ ദുരവസ്ഥയ്ക്ക് നാറ്റോ രാജ്യങ്ങള്‍ ഉത്തരവാദിത്തം ഏറ്റെടുക്കണമെന്നും സാമ്പത്തിക പുരോഗതിക്കും ഭാവി വികസനത്തിനും സമൃദ്ധിക്കും അവസരങ്ങള്‍ നല്‍കണമെന്നും പ്രസ്താവനയില്‍ പറയുന്നു.

ഐ.എസ്.ഐ.എല്‍, അല്‍ ഖ്വയ്ദ, തെഹ്രീക്-ഇ-താലിബാന്‍ പാകിസ്ഥാന്‍ (ടി.ടി.പി), ബലൂചിസ്ഥാന്‍ ലിബറേഷന്‍ ആര്‍മി, മജീദ് ബ്രിഗേഡ്, അഫ്ഗാനിസ്ഥാനിലെ മറ്റ് ഭീകര ഗ്രൂപ്പുകള്‍ എന്നിവയുടെ വര്‍ദ്ധിച്ചുവരുന്ന പ്രവര്‍ത്തനങ്ങള്‍ പ്രാദേശിക, ആഗോള സമാധാനത്തിന് ഭീഷണിയാണെന്ന് ഈ രാജ്യങ്ങള്‍ വിശേഷിപ്പിച്ചു.