പാകിസ്ഥാനെ നടുക്കി ബോംബ് സ്ഫോടനം: 11 പേർ കൊല്ലപ്പെട്ടു

ഇസ്ലാമാബാദ്: പാകിസ്ഥാനിലെ പ്രക്ഷുബ്ധമായ ബലൂചിസ്ഥാൻ പ്രവിശ്യയിൽ വീണ്ടും ബോംബ് സ്ഫോടനം.  രണ്ടിടങ്ങളിൽ നടന്ന ബോംബാക്രമണങ്ങളിൽ കുറഞ്ഞത് 11 പേർ കൊല്ലപ്പെട്ടതായി പാക് ഭരണകൂടം സ്ഥിരീകരിച്ചു. 

ആദ്യ സംഭവത്തിൽ,  ഇറാനുമായുള്ള അതിർത്തിക്കടുത്തുള്ള പ്രവിശ്യയിലെ ഡാഷ്ത് പട്ടണത്തിൽ അർദ്ധസൈനികരുടെ വാഹനവ്യൂഹത്തിലേക്ക് ഒരു ചാവേർ ബോംബർ സ്ഫോടകവസ്തുക്കൾ നിറച്ച കാർ ഇടിച്ചു കയറ്റുകയായിരുന്നു. കൊല്ലപ്പെട്ട അഞ്ച് പേരിൽ മൂന്ന് സൈനികരും ഉൾപ്പെട്ടിട്ടുണ്ടെന്ന് രണ്ട് പ്രാദേശിക സർക്കാർ ഉദ്യോഗസ്ഥർ പറഞ്ഞു. രണ്ടാമത്തെ സംഭവത്തിൽ,  അഫ്ഗാനിസ്ഥാനുമായുള്ള അതിർത്തി കടന്നുള്ള ബോംബ് സ്ഫോടനത്തിൽ ആറ് തൊഴിലാളികൾ കൊല്ലപ്പെട്ടു. ഇരു ആക്രമണങ്ങളുടെയും ഉത്തരവാദിത്വം ബലൂചിസ്ഥാനിലെ പാകിസ്ഥാൻ ഭരണത്തിനെതിരെ സായുധ പ്രസ്ഥാനം നടത്തുന്ന പ്രമുഖ ബലൂച് ഗ്രൂപ്പായ ബലൂച് ലിബറേഷൻ ആർമി ഏറ്റെടുത്തു.