ബോണ്ടി ബീച്ച് ആക്രമണകാരികളെ ഇസ്ലാമിക് സ്റ്റേറ്റ് പ്രത്യയശാസ്ത്രമാണ് നയിക്കുന്നത്: ഓസ്‌ട്രേലിയൻ പ്രധാനമന്ത്രി ആന്റണി അൽബനീസ്

സിഡ്നി: സിഡ്നിയിലെ ബോണ്ടി ബീച്ചില്‍ 16 പേരുടെ മരണത്തിനിടയാക്കിയ ആക്രമണത്തിന് ഉത്തരവാദികളായ രണ്ട് പ്രതികള്‍ ഇസ്ലാമിക് സ്റ്റേറ്റ് ഓഫ് ഇറാഖ് ആന്‍ഡ് സിറിയ (ഐസിസ്) പ്രത്യയശാസ്ത്രത്താല്‍ നയിക്കപ്പെട്ടവരാണെന്ന് ഓസ്ട്രേലിയന്‍ പ്രധാനമന്ത്രി ആന്റണി അല്‍ബനീസ്.

50 കാരനായ സാജിദ് അക്രവും 24 കാരനായ നവീദ് അക്രവും അച്ഛനും-മകനുമാണ്. ഞായറാഴ്ച വൈകുന്നേരം ഒരു ജൂത ഉത്സവം ലക്ഷ്യമിട്ടായിരുന്നു ആക്രമണം നടത്തിയത്.

'ഇത് ഇസ്ലാമിക് സ്റ്റേറ്റ് പ്രത്യയശാസ്ത്രത്താല്‍ പ്രചോദിതമാണെന്ന് തോന്നുന്നു,' അല്‍ബനീസ് പറഞ്ഞു. 'ഒരു ദശാബ്ദത്തിലേറെയായി നിലനില്‍ക്കുന്ന പ്രത്യയശാസ്ത്രമാണ് ഈ വെറുപ്പിന്റെ പ്രത്യയശാസ്ത്രത്തിലേക്ക് നയിച്ചത്.

2019 ല്‍ ഓസ്ട്രേലിയന്‍ ഏജന്‍സികളുടെ നിരീക്ഷണത്തില്‍ നവീദ് ഉണ്ടായിരുന്നുവെന്ന് അല്‍ബനീസ് പറയുന്നു, എന്നാല്‍ അന്ന് അദ്ദേഹത്തെ ഒരു ഭീഷണിയായി കണക്കാക്കിയിരുന്നില്ല. ഞായറാഴ്ച ബോണ്ടി ബീച്ചില്‍ നടന്ന 'കൂട്ടക്കൊല'യ്ക്ക് മുമ്പ് തന്നെ നവീനും പിതാവും തീവ്രവാദികളായിരുന്നുവെന്ന് ഓസ്ട്രേലിയന്‍ പ്രധാനമന്ത്രി പറഞ്ഞു.

സംശയിക്കപ്പെടുന്നവരുടെ കാറില്‍ നിന്ന് ഐസിസ് പതാക കണ്ടെടുത്തതിന് ശേഷമാണ് അല്‍ബനീസിന്റെ പരാമര്‍ശം. ഇരുവരും യഥാര്‍ത്ഥത്തില്‍ പാകിസ്ഥാനില്‍ നിന്നുള്ളവരാണെന്നും പിതാവിന് ആറ് തോക്ക് ലൈസന്‍സുകള്‍ പോലും ഉണ്ടെന്നും ഓസ്ട്രേലിയന്‍ ഉദ്യോഗസ്ഥര്‍ പറഞ്ഞു.

ഇത് ഒറ്റപ്പെട്ട ഒരു ആക്രമണമാണോ അതോ അക്രമികള്‍ക്ക് ഏതെങ്കിലും തീവ്രവാദ ഗ്രൂപ്പുമായി ബന്ധമുണ്ടോ എന്ന് കണ്ടെത്താന്‍ നിലവില്‍ അന്വേഷണം നടക്കുന്നുണ്ടെന്ന് അവര്‍ പറഞ്ഞു.