അസ്ഥി പൊട്ടലുകൾക്ക് ഇനി മണിക്കൂറുകൾ നീണ്ട ശസ്ത്രക്രിയ വേണ്ട, 3 മിനിറ്റിൽ ഭേദമാകും ! ‘ബോൺ ഗ്ലൂ’ വികസിപ്പിച്ച് ചൈന

ബെയ്ജിങ്: അസ്ഥി പൊട്ടലുകൾക്ക് ഇനി മണിക്കൂറുകൾക്കുള്ള ശസ്ത്രക്രിയ വേണ്ട. വെറും മൂന്ന് മിനിറ്റിനകം അസ്ഥി പൊട്ടൽ ഭേദമാക്കുന്ന ‘ബോൺ-02’ എന്ന മെഡിക്കൽ ഗ്ലൂ ചൈനീസ് ശാസ്ത്രജ്ഞർ വികസിപ്പിച്ചു. മെഡിക്കൽ ലോകത്ത് വലിയൊരു മുന്നേറ്റമായി ഇതിനെ വിലയിരുത്തുന്നു.

‘ബോൺ-02’ ഉപയോഗിച്ച് പൊട്ടിയ അസ്ഥി മിനിറ്റുകൾക്കകം ഉറപ്പിച്ചു കൂട്ടിച്ചേർക്കാൻ സാധിക്കും. ഗ്ലൂ ശരീരത്തിൽ സ്വാഭാവികമായി ലയിക്കുന്നതിനാൽ പ്ലേറ്റും സ്ക്രൂവും പോലുള്ള മെറ്റൽ ഇംപ്ലാന്റുകൾ വീണ്ടും ശസ്ത്രക്രിയ നടത്തി നീക്കം ചെയ്യേണ്ട സാഹചര്യം ഒഴിവാകും. 

പരീക്ഷണങ്ങളിൽ 400 പൗണ്ടിൽ കൂടുതലുള്ള ബോണ്ടിംഗ് ഫോഴ്‌സ്, 0.5 MPa ഷിയർ സ്ട്രെങ്ത്, 10 MPa കമ്പ്രഷൻ സ്ട്രെങ്ത് എന്നിവ തെളിയിച്ചതായാണ് റിപ്പോർട്ട്.

150-ത്തിലധികം രോഗികളിൽ നടത്തിയ പരീക്ഷണങ്ങളിൽ ‘ബോൺ-02’ മികച്ച ഫലങ്ങൾ കാഴ്ചവെച്ചു. സാധാരണയായി മണിക്കൂറുകൾ വേണ്ടിവരുന്ന ശസ്ത്രക്രിയ ഗ്ലൂ ഉപയോഗിച്ച് വെറും മിനിറ്റുകൾക്കകം പൂർത്തിയാക്കാനായതായി ഗവേഷകർ വ്യക്തമാക്കി. സമുദ്രത്തിൽ കല്ലുകളിൽ ഉറച്ചുപിടിക്കുന്ന ഓയിസ്റ്ററുകളുടെ സ്വഭാവമാണ് ഗവേഷണത്തിന് പ്രചോദനമായത്.

പുതിയ ‘ബോൺ-02’ സുരക്ഷിതവും കാര്യക്ഷമവുമായ ചികിത്സാ മാർഗം തുറന്ന് കൊടുക്കുമെന്നാണ് വിദഗ്ധർ പ്രതീക്ഷിക്കുന്നത്.