ബ്രസീലിലെ ഗുണ്ടാ വിരുദ്ധ ഓപ്പറേഷൻ: 64 പേർ കൊല്ലപ്പെട്ടു

റിയോ ഡി ജനീറോ:  ബ്രസീലിലെ ഇതുവരെയുള്ളതില്‍ വച്ച് ഏറ്റവും വലിയ ഗുണ്ടാ വിരുദ്ധ റെയ്ഡുകളിലൊന്നില്‍ ഏകദേശം 2,500 പോലീസുകാരും സൈനികരും നിരവധി റിയോ ഡി ജനീറോ ഫാവെലകളില്‍ ഇരച്ചുകയറി. 81 പ്രതികളെ അറസ്റ്റ് ചെയ്യുകയും കുറഞ്ഞത് 60 പേര്‍ കൊല്ലപ്പെടുകയും ചെയ്തതായി ഉദ്യോഗസ്ഥര്‍ പറഞ്ഞു.

രാജ്യത്തെ ഏറ്റവും ശക്തമായ മയക്കുമരുന്ന് കടത്ത് ഗ്രൂപ്പുകളില്‍ ഒന്നായ റെഡ് കമാന്‍ഡിനെ ലക്ഷ്യമിട്ടാണ് ഏകോപിത ഓപ്പറേഷന്‍ നടത്തിയത്. കോംപ്ലക്‌സോ ഡോ അലെമോ, പെന്‍ഹ തുടങ്ങിയ താഴ്ന്ന വരുമാനക്കാര്‍ താമസിക്കുന്ന പ്രദേശങ്ങളിലൂടെയായിരുന്നു ഇത്. 

കവചിത വാഹനങ്ങള്‍ ഇടുങ്ങിയ ഇടവഴികളിലൂടെ നീങ്ങുമ്പോള്‍ ഹെലികോപ്റ്ററുകള്‍ തലയ്ക്കു മുകളിലൂടെ വട്ടമിട്ടു പറന്നു, മണിക്കൂറുകള്‍ നീണ്ട വെടിവയ്പ്പുകള്‍ നടന്നു.

ബ്രസീലിന്റെ സമീപകാല ചരിത്രത്തിലെ ഏറ്റവും അക്രമാസക്തമായ പോലീസ് നടപടികളില്‍ ഒന്നായിരുന്നു, ഓരോ മരണത്തിലും അന്വേഷണം നടത്തണമെന്ന് മനുഷ്യാവകാശ സംഘടന ആവശ്യപ്പെട്ടു.