ബ്രൗൺ യൂണിവേഴ്‌സിറ്റി വെടിവയ്പ്പ്: ദിവസങ്ങളോളം നീണ്ട തിരച്ചിലിനുശേഷം തോക്കുധാരിയെ മരിച്ച നിലയിൽ കണ്ടെത്തി

വാഷിംഗ്ടണ്‍: ബ്രൗണ്‍ യൂണിവേഴ്സിറ്റിയില്‍ രണ്ട് പേരെ കൊലപ്പെടുത്തുകയും നിരവധി പേര്‍ക്ക് പരിക്കേല്‍പ്പിക്കുകയും ചെയ്തതായി സംശയിക്കുന്ന ഒരാളെ ന്യൂ ഹാംഷെയറിലെ ഒരു സംഭരണശാലയില്‍ മരിച്ച നിലയില്‍ കണ്ടെത്തിയതായി അധികൃതരെ ഉദ്ധരിച്ച് എപി റിപ്പോര്‍ട്ട് ചെയ്തു. വ്യാഴാഴ്ച വൈകുന്നേരമാണ് പ്രതിയെ കണ്ടെത്തിയത്, സ്വയം വെടിവെച്ചാണ് മരിച്ചതെന്ന് കരുതുന്നു. 

ഉദ്യോഗസ്ഥര്‍ പറയുന്നതനുസരിച്ച്, പ്രതി ബ്രൗണ്‍ യൂണിവേഴ്സിറ്റിയിലെ മുന്‍ വിദ്യാര്‍ത്ഥിയായിരുന്നു. 25 വര്‍ഷം മുമ്പ് കോളേജില്‍ ചേര്‍ന്നതായി റിപ്പോര്‍ട്ടുണ്ട്.  

തിങ്കളാഴ്ച ബ്രൂക്ക്ലൈനിലെ വീട്ടില്‍ വെടിയേറ്റ് കൊല്ലപ്പെട്ട മസാച്യുസെറ്റ്സ് ഇന്‍സ്റ്റിറ്റ്യൂട്ട് ഓഫ് ടെക്നോളജി (എംഐടി) പ്രൊഫസറുടെ മരണവുമായി ഇയാള്‍ക്ക് ബന്ധമുണ്ടെന്ന് ഉദ്യോഗസ്ഥര്‍ സംശയിക്കുന്നു. രണ്ട് സംഭവങ്ങളും തമ്മിലുള്ള ബന്ധം അധികൃതര്‍ ഇതുവരെ ഔദ്യോഗികമായി സ്ഥിരീകരിച്ചിട്ടില്ല.

ശനിയാഴ്ച ബ്രൗണ്‍ സര്‍വകലാശാലയില്‍ നടന്ന കൂട്ട വെടിവയ്പ്പില്‍ രണ്ട് പേര്‍ക്ക് ജീവന്‍ നഷ്ടപ്പെടുകയും ഒമ്പത് പേര്‍ക്ക് പരിക്കേല്‍ക്കുകയും ചെയ്തു. ബ്രൗണ്‍ വെടിവയ്പ്പും എംഐടി പ്രൊഫസര്‍ നുനോ എഫ്ജി ലൂറീറോയ്ക്കെതിരായ ആക്രമണവും തമ്മിലുള്ള ബന്ധം അന്വേഷിക്കുകയാണെന്ന് അന്വേഷകര്‍ പറഞ്ഞു.

കാമ്പസില്‍ ഏകദേശം 1,200 ക്യാമറകളുണ്ടെന്ന് സര്‍വകലാശാല അധികൃതര്‍ പറഞ്ഞു, എന്നാല്‍ എഞ്ചിനീയറിംഗ് കെട്ടിടത്തിന്റെ പഴയ ഒരു ഭാഗത്താണ് ആക്രമണം നടന്നത്, അവിടെ ക്യാമറകള്‍ വളരെ കുറവാണ്.

വെടിയുതിര്‍ത്തയാള്‍ അടുത്തുള്ള റെസിഡന്‍ഷ്യല്‍ സ്ട്രീറ്റിന് അഭിമുഖമായുള്ള ഒരു വാതില്‍ ഉപയോഗിച്ച് അകത്തേക്കും പുറത്തേക്കും പ്രവേശിച്ചുവെന്നും എന്നാല്‍ കാമ്പസ് ക്യാമറകളില്‍ ഇത് പകര്‍ത്താന്‍ കഴിഞ്ഞില്ലെന്നും അന്വേഷണ ഉദ്യോഗസ്ഥര്‍ കരുതുന്നു.