'കാർട്ടൽ ഡി ലോസ് സോൾസിനെ' വിദേശ ഭീകര സംഘടനയായി പ്രഖ്യാപിച്ച് യുഎസ്; നീക്കത്തെ ശക്തമായി തള്ളി വെനിസ്വേല

വെനിസ്വേല:  വെനിസ്വേലന്‍ പ്രസിഡന്റ് നിക്കോളാസ് മഡുറോയും അദ്ദേഹത്തിന്റെ ഗവണ്‍മെന്റിലെ മുതിര്‍ന്ന അംഗങ്ങളും ഉള്‍പ്പെടുന്നതായി യുഎസ് ഉദ്യോഗസ്ഥര്‍ ആരോപിക്കുന്ന, കാര്‍ട്ടല്‍ ഡി ലോസ് സോളസിനെ വിദേശ ഭീകര സംഘടനയായി അമേരിക്ക ഔദ്യോഗികമായി പ്രഖ്യാപിച്ചു. 

കൂടാതെ ആ ഗ്രൂപ്പിനെതിരെ തീവ്രവാദവുമായി ബന്ധപ്പെട്ട പുതിയ ഉപരോധങ്ങളും ചേര്‍ത്തു. 'നിലവിലില്ലാത്ത' ഒരു ഗ്രൂപ്പിനെ തീവ്രവാദ സംഘടനയായി മുദ്രകുത്താനുള്ള 'പരിഹാസ്യമായ' ശ്രമമാണിതെന്ന് വിശേഷിപ്പിച്ച വെനിസ്വേല ഉടന്‍ തന്നെ ഈ നീക്കത്തെ തള്ളിക്കളഞ്ഞു.

അമേരിക്കയിലേക്ക് നിയമവിരുദ്ധ മയക്കുമരുന്ന് കടത്തുന്നതില്‍ പങ്കുണ്ടെന്ന് ആരോപിച്ച് വാഷിംഗ്ടണ്‍ ഈ ഗ്രൂപ്പിനെ എഫ്ടിഒ ആയി പ്രഖ്യാപിക്കുമെന്ന് യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോ ഈ മാസം ആദ്യം പറഞ്ഞിരുന്നു.

കരീബിയനില്‍ യുഎസ് വലിയ സൈനിക വിന്യാസം നടത്തുന്നതിനാല്‍ മഡുറോ വര്‍ദ്ധിച്ചുവരുന്ന സമ്മര്‍ദ്ദം നേരിടുന്ന സമയത്താണ് ഈ പ്രഖ്യാപനം.