എല്ലാത്തരം ഭീകരതയെയും ചൈന അപലപിക്കുന്നു. ഇന്ത്യയ്ക്കും പാകിസ്ഥാനും ഇടയില്‍ നടന്നുകൊണ്ടിരിക്കുന്ന സംഭവവികാസങ്ങളില്‍ ആശങ്ക പ്രകടിപ്പിച്ച് ചൈനീസ് വിദേശകാര്യ മന്ത്രാലയം

ബീജിംഗ്:  ഇന്ത്യയ്ക്കും പാകിസ്ഥാനും ഇടയില്‍ നടന്നുകൊണ്ടിരിക്കുന്ന സംഭവവികാസങ്ങളില്‍ ചൈനീസ് വിദേശകാര്യ മന്ത്രാലയ വക്താവ് ലിന്‍ ജിയാന്‍ ആശങ്ക പ്രകടിപ്പിച്ചു.

സമാധാനത്തിന്റെയും സ്ഥിരതയുടെയും മൊത്തത്തിലുള്ള താല്‍പ്പര്യങ്ങള്‍ക്കായി പ്രവര്‍ത്തിക്കാനും, യുഎന്‍ ചാര്‍ട്ടര്‍ ഉള്‍പ്പെടെയുള്ള അന്താരാഷ്ട്ര നിയമങ്ങള്‍ പാലിക്കാനും, ശാന്തത പാലിക്കാനും, സംയമനം പാലിക്കാനും, സ്ഥിതി കൂടുതല്‍ വഷളാക്കുന്ന നടപടികള്‍ സ്വീകരിക്കുന്നതില്‍ നിന്ന് വിട്ടുനില്‍ക്കാനും ചൈന ഇരു രാജ്യങ്ങളോടും ആവശ്യപ്പെട്ടു.

വ്യാഴാഴ്ച ഒരു പത്രസമ്മേളനത്തില്‍ സംസാരിക്കവെ, ഇരു രാജ്യങ്ങളും തമ്മിലുള്ള സംഘര്‍ഷങ്ങള്‍ ലഘൂകരിക്കുന്നതില്‍ ക്രിയാത്മക പങ്ക് വഹിക്കുന്നതിന് അന്താരാഷ്ട്ര സമൂഹവുമായി ചേര്‍ന്ന് പ്രവര്‍ത്തിക്കാനുള്ള ചൈനയുടെ സന്നദ്ധത ലിന്‍ ജിയാന്‍ പ്രകടിപ്പിച്ചു.

എല്ലാത്തരം ഭീകരതയെയും ചൈന അപലപിക്കുന്നതായി അദ്ദേഹം ആവര്‍ത്തിച്ചു.