പുതിയ ഭീകരവാദി സഖ്യം രൂപപ്പെടുന്നു? ഹമാസുമായി ബന്ധമുണ്ടെന്ന് ലഷ്കർ കമാൻഡറുടെ വെളിപ്പെടുത്തൽ

ഡല്‍ഹി: ആഗോള ഭീകര സംഘടനകള്‍ തമ്മിലുള്ള ഏകോപനം ശക്തമാകുന്നതിന്റെ സൂചനകള്‍ നല്‍കിക്കൊണ്ട്, പാകിസ്താന്‍ ആസ്ഥാനമായുള്ള ലഷ്‌കര്‍-ഇ-തൊയ്ബ കമാന്‍ഡര്‍ ഹമാസ് നേതൃത്വവുമായുള്ള തന്റെ ബന്ധം പരസ്യമായി സമ്മതിച്ചു. ഇത് ദക്ഷിണേഷ്യയിലെയും മിഡില്‍ ഈസ്റ്റിലെയും ഭീകര ശൃംഖലകള്‍ തമ്മിലുള്ള സഹകരണം വര്‍ധിക്കുന്നതിനെക്കുറിച്ചുള്ള ആശങ്കകള്‍ വര്‍ധിപ്പിക്കുന്നു.

ലഷ്‌കര്‍-ഇ-തൊയ്ബയുടെ രാഷ്ട്രീയ മുഖമെന്ന് കരുതപ്പെടുന്ന പാകിസ്താന്‍ മര്‍ക്കസി മുസ്ലിം ലീഗിന്റെ മുതിര്‍ന്ന കമാന്‍ഡറായ ഫൈസല്‍ നദീം ആണ് ഖത്തറിലെ ദോഹയില്‍ വെച്ച് ഹമാസ് നേതാക്കളുമായി കൂടിക്കാഴ്ച നടത്തിയതായി വെളിപ്പെടുത്തിയത്. അടുത്തിടെ പുറത്തുവന്ന വീഡിയോയിലാണ് നദീം ഈ കാര്യങ്ങള്‍ വ്യക്തമാക്കിയത്.

2024-ല്‍ ദോഹയില്‍ വെച്ച് മുതിര്‍ന്ന ഹമാസ് നേതാവ് ഖാലിദ് മഷാലിനെ നേരിട്ട് കണ്ടതായി നദീം സമ്മതിച്ചു. കശ്മീരിലെ പഹല്‍ഗാം ഭീകരാക്രമണത്തിന്റെ മുഖ്യസൂത്രധാരനെന്ന് കരുതപ്പെടുന്ന സെയ്ഫുള്ള കസൂരിയും നദീമിനൊപ്പമുണ്ടായിരുന്നു.

ജനുവരി ആദ്യവാരം പാകിസ്താനിലെ ഗുജ്രന്‍വാലയില്‍ വെച്ച് ഹമാസ് കമാന്‍ഡര്‍ നാജി സഹീറും ലഷ്‌കര്‍ കമാന്‍ഡര്‍ റാഷിദ് അലി സന്ധുവും വേദി പങ്കിട്ട വാര്‍ത്തകളും പുറത്തുവന്നിരുന്നു. നാജി സഹീര്‍ 2023 ഒക്ടോബറിന് ശേഷം ഏകദേശം 15 തവണ പാകിസ്താന്‍ സന്ദര്‍ശിച്ചതായാണ് വിവരം.

ഇന്ത്യന്‍ രഹസ്യാന്വേഷണ ഏജന്‍സികള്‍ ഈ നീക്കങ്ങളെ അതീവ ഗൗരവത്തോടെയാണ് കാണുന്നത്. ലഷ്‌കര്‍, ഹമാസ് എന്നീ രണ്ട് സംഘടനകളെയും അമേരിക്കയുള്‍പ്പെടെയുള്ള രാജ്യങ്ങള്‍ ഭീകര സംഘടനകളായി പ്രഖ്യാപിച്ചിട്ടുള്ളതാണ്. ഇവ തമ്മിലുള്ള സഖ്യം ഭീകരവാദത്തിനായുള്ള ധനസമാഹരണം, പരിശീലനം, ആശയപ്രചാരണം എന്നിവയില്‍ വലിയ മാറ്റങ്ങള്‍ വരുത്തിയേക്കാമെന്ന് വിദഗ്ധര്‍ മുന്നറിയിപ്പ് നല്‍കുന്നു.

ധനകാര്യ കുറ്റകൃത്യങ്ങള്‍ നിരീക്ഷിക്കുന്ന അന്താരാഷ്ട്ര ഏജന്‍സി ഉള്‍പ്പെടെയുള്ള ആഗോള വേദികളില്‍ ഈ തെളിവുകള്‍ ഇന്ത്യ ഉയര്‍ത്തിക്കാട്ടും. രണ്ട് സംഘടനകളും തമ്മിലുള്ള ഈ 'ഭീകര സഖ്യം' പ്രാദേശികവും അന്തര്‍ദേശീയവുമായ സുരക്ഷയ്ക്ക് വലിയ ഭീഷണിയാണെന്ന് അധികൃതര്‍ വിലയിരുത്തുന്നു.