ബംഗ്ലാദേശിൽ സുരക്ഷാ ഭീഷണി: ഇന്ത്യൻ നയതന്ത്ര ഉദ്യോഗസ്ഥരുടെ കുടുംബങ്ങളെ തിരിച്ചുകൊണ്ടുവരുന്നു. ബംഗ്ലാദേശ് ഇനി 'നോണ്‍-ഫാമിലി' പോസ്റ്റിംഗ്

ഡല്‍ഹി: ബംഗ്ലാദേശിലെ വഷളായിക്കൊണ്ടിരിക്കുന്ന സുരക്ഷാ സാഹചര്യം കണക്കിലെടുത്ത് അവിടെയുള്ള ഇന്ത്യന്‍ നയതന്ത്ര ഉദ്യോഗസ്ഥരുടെ കുടുംബാംഗങ്ങളെയും ആശ്രിതരെയും അടിയന്തരമായി തിരികെ വിളിക്കാന്‍ കേന്ദ്ര സര്‍ക്കാര്‍ തീരുമാനിച്ചു.

ഫെബ്രുവരി 12-ന് നടക്കാനിരിക്കുന്ന പൊതുതിരഞ്ഞെടുപ്പിന് മുന്നോടിയായി രാജ്യത്ത് അക്രമസംഭവങ്ങള്‍ വര്‍ദ്ധിക്കുന്ന സാഹചര്യത്തിലാണ് മുന്‍കരുതല്‍ നടപടിയായി ഇന്ത്യ ഈ തീരുമാനമെടുത്തത്.

ബംഗ്ലാദേശ് ഇനി 'നോണ്‍-ഫാമിലി' പോസ്റ്റിംഗ്

പാകിസ്ഥാന് സമാനമായി ബംഗ്ലാദേശിനെയും ഇനി മുതല്‍ 'നോണ്‍-ഫാമിലി' പോസ്റ്റിംഗ് വിഭാഗത്തിലാണ് ഇന്ത്യ ഉള്‍പ്പെടുത്തിയിരിക്കുന്നത്. ഇതോടെ, ഇന്ത്യന്‍ ഹൈക്കമ്മീഷനിലെയും മറ്റ് നയതന്ത്ര കാര്യാലയങ്ങളിലെയും ഉദ്യോഗസ്ഥര്‍ക്ക് കുടുംബത്തെ കൂടെ താമസിപ്പിക്കാന്‍ അനുമതിയുണ്ടാകില്ല.

ധാക്കയിലെ ഹൈക്കമ്മീഷന് പുറമെ ചിറ്റഗോങ്, രാജ്ഷാഹി, ഖുല്‍ന, സില്‍ഹെറ്റ് എന്നിവിടങ്ങളിലെ അസിസ്റ്റന്റ് ഹൈക്കമ്മീഷനുകള്‍ക്കും ഈ നിര്‍ദ്ദേശം ബാധകമാണ്. എന്നാല്‍ ഇന്ത്യന്‍ ഓഫീസുകള്‍ പൂര്‍ണ്ണതോതില്‍ പ്രവര്‍ത്തിക്കുമെന്ന് വിദേശകാര്യ മന്ത്രാലയം വ്യക്തമാക്കി.

ഡിസംബറില്‍ ഇസ്ലാമിസ്റ്റ് യുവനേതാവ് ഷെരീഫ് ഒസ്മാന്‍ ഹാദി കൊല്ലപ്പെട്ടതിന് പിന്നാലെ ഇന്ത്യക്കെതിരെ ബംഗ്ലാദേശില്‍ വ്യാപകമായ പ്രതിഷേധങ്ങള്‍ നടന്നിരുന്നു. അക്രമികള്‍ ഇന്ത്യയിലേക്ക് കടന്നുവെന്ന വ്യാജപ്രചാരണം നയതന്ത്ര കാര്യാലയങ്ങള്‍ക്ക് നേരെ ആക്രമണമുണ്ടാകാന്‍ കാരണമായി.

ന്യൂനപക്ഷങ്ങള്‍ക്കെതിരെയുള്ള അതിക്രമങ്ങള്‍ 

ബംഗ്ലാദേശിലെ ഹിന്ദു വിഭാഗത്തിന് നേരെ വര്‍ദ്ധിച്ചുവരുന്ന ആക്രമണങ്ങളില്‍ ഇന്ത്യ ശക്തമായ പ്രതിഷേധം രേഖപ്പെടുത്തിയിരുന്നു. മയ്മന്‍സിംഗില്‍ ഹിന്ദു യുവാവിനെ ആള്‍ക്കൂട്ടം മര്‍ദ്ദിച്ചു കൊലപ്പെടുത്തിയ സംഭവം ഇരുരാജ്യങ്ങളും തമ്മിലുള്ള ബന്ധം കൂടുതല്‍ വഷളാക്കി.

ഷെയ്ഖ് ഹസീനയുടെ അഭയം 

മുന്‍ പ്രധാനമന്ത്രി ഷെയ്ഖ് ഹസീനയ്ക്ക് ഇന്ത്യ അഭയം നല്‍കിയത് മുഹമ്മദ് യൂനസിന്റെ നേതൃത്വത്തിലുള്ള ഇടക്കാല സര്‍ക്കാരിനെ ചൊടിപ്പിച്ചിട്ടുണ്ട്. ഹസീനയെ വിട്ടുനല്‍കണമെന്ന ധാക്കയുടെ ആവശ്യം ഇന്ത്യ ഇതുവരെ അംഗീകരിച്ചിട്ടില്ല.

ക്രിക്കറ്റിലും വിള്ളല്‍

നയതന്ത്ര തര്‍ക്കം കായിക മേഖലയെയും ബാധിച്ചിട്ടുണ്ട്. സുരക്ഷാ കാരണങ്ങളാല്‍ ഇന്ത്യന്‍ പ്രീമിയര്‍ ലീഗില്‍ നിന്ന് ബംഗ്ലാദേശ് താരങ്ങളെ ഒഴിവാക്കാന്‍ ബി.സി.സി.ഐ നിര്‍ദ്ദേശം നല്‍കിയതിനെത്തുടര്‍ന്ന് ബംഗ്ലാദേശ് ഐ.പി.എല്‍ സംപ്രേഷണം നിരോധിക്കുകയും 2026-ലെ ടി20 ലോകകപ്പിനായി ഇന്ത്യയിലേക്ക് വരാന്‍ വിസമ്മതിക്കുകയും ചെയ്തിരിക്കുകയാണ്.

ബംഗ്ലാദേശിലെ ഇന്ത്യക്കാരുടെ സുരക്ഷ ഉറപ്പാക്കാന്‍ ഇടക്കാല സര്‍ക്കാരിന് ബാധ്യതയുണ്ടെന്ന് ഇന്ത്യ ആവര്‍ത്തിച്ചു വ്യക്തമാക്കിയിട്ടുണ്ട്.