/sathyam/media/media_files/2025/07/31/hgfff-2025-07-31-03-33-23.jpg)
മോസ്കോ: ദിവസങ്ങള് വൈകിയെങ്കിലും ന്യൂ ബാബ വാങ്ക എന്ന പേരില് പ്രശസ്തയായ മാംഗ കാര്ട്ടൂണിസ്ററ് റയോ തത്സുകിയുടെ പ്രവചനം യാഥാര്ഥ്യമായി. റഷ്യയില് വന് ഭൂചലനം ഉണ്ടായതിനു പിന്നാലെ സുനാമി മുന്നറിയിപ്പ് നല്കിയിരിക്കുകയാണ് ജപ്പാന് അടക്കമുള്ള രാജ്യങ്ങള്. ജൂലൈ 5ന് ജപ്പാനില് വന് ഭൂകമ്പവും സുനാമിയും ഉണ്ടാകുമെന്നായിരുന്നു തത്സുകിയുടെ പ്രവചനം.
ദി ഫ്യൂച്ചര് ഐ സോ എന്ന പുസ്തകത്തിലാണ് 2025 ജൂലൈ 5ന് കടലിനടിയിലെ വന് ഭൂചലനത്തിന്റെ ഫലമായി ജപ്പാനില് സുനാമിയുണ്ടാകുമെന്നും ജപ്പാനും ഫിലിപ്പീന്സും പരസ്പരം അടര്ന്നു മാറുമെന്നും പ്രവചിച്ചിരുന്നത്. 2011 ല് ജപ്പാനെ ഉലച്ച സുനാമിയെയും തത്സുകി പ്രവചിച്ചിരുന്നു. അതു കൊണ്ടു തന്നെ നിരവധി പേര് രണ്ടാമത്തെ പ്രവചനത്തെയും ഗൗരവത്തില് എടുത്തിരുന്നു.
സുനാമി ഭീതിയില് വിനോദസഞ്ചാരികള് കൂട്ടത്തോടെ ജപ്പാനെ ഒഴിവാക്കി. താന് കാണുന്ന സ്വപ്നങ്ങളെ ആസ്പദമാക്കിയാണ് ഇവരുടെ പ്രവചനം. 2011ലെ സുനാമി മുതല് കൊവിഡ് മഹാമാരി വരെ കൃത്യമായി പ്രവചിച്ചിരുന്നു എന്ന പ്രചരണമാണ് ജപ്പാന്കാരെ ആശങ്കാകുലരാക്കിയത്. ആഴ്ചകളോളം സമൂഹ മാധ്യമങ്ങളില് വൈറലായിരുന്നു തത്സുകിയുടെ പ്രവചനങ്ങള്.
ഇതോടെ വിനോദസഞ്ചാര മേഖലയില് വന് നഷ്ടമാണ് ജപ്പാനുണ്ടായത്. എല്ലാവരും ജിജ്ഞാസയോടെ കാത്തിരുന്നുവെങ്കിലും ജൂലൈ 5 വലിയ പ്രശ്നങ്ങളൊന്നുമില്ലാതെ കടന്നു പോയി. ഇതോടെ തത്സുകി വലിയ രീതിയില് വിമര്ശിക്കപ്പെട്ടിരുന്നു.
എന്നാല് 25 ദിവസങ്ങള്ക്കു ശേഷം തത്സുകി പ്രവചിച്ചതിനു സമാനമായ അവസ്ഥയിലൂടെ കടന്നു പോകുകയാണ് ജപ്പാന്. പറഞ്ഞ ദിവസം തെറ്റിപ്പോയി എങ്കിലും തത്സുകി പറഞ്ഞത് വാസ്തവമായെന്ന മട്ടിലുള്ള ചര്ച്ചകള് ഇന്റര്നെറ്റില് കൊഴുക്കുകയാണ്.