പലസ്തീൻ രാഷ്ട്രത്തെ അംഗീകരിക്കുന്നത് ഹമാസിനെ ഒറ്റപ്പെടുത്താനുള്ള ഏറ്റവും നല്ല മാർഗം: ഇമ്മാനുവൽ മാക്രോൺ

പാരീസ്: സ്വന്തം രാജ്യത്ത് സാമ്പത്തികവും രാഷ്ട്രീയവുമായ പ്രതിസന്ധി നേരിടുന്നതിനിടെ, പലസ്തീന്‍ രാഷ്ട്രത്തെ അംഗീകരിക്കുന്നത് ഹമാസ് തീവ്രവാദ ഗ്രൂപ്പിനെ ഒറ്റപ്പെടുത്താന്‍ സഹായിക്കുമെന്ന് ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ പറഞ്ഞു. ഗാസയില്‍ ഇസ്രായേല്‍ നടത്തുന്ന തുടര്‍ച്ചയായ ആക്രമണങ്ങളെ അദ്ദേഹം അപലപിക്കുകയും ചെയ്തു.

ഇസ്രായേലി ടെലിവിഷന്റെ ചാനല്‍ 12-ന് നല്‍കിയ അഭിമുഖത്തില്‍ പലസ്തീന്‍ ജനതയുടെ ന്യായമായ കാഴ്ചപ്പാടിനും അവര്‍ ഇന്ന് അനുഭവിക്കുന്ന ദുരിതങ്ങള്‍ക്കും ഹമാസുമായി ഒരു ബന്ധവുമില്ലെന്ന് പ്രസിഡന്റ് മാക്രോണ്‍ പറഞ്ഞു.

പലസ്തീന്‍ രാഷ്ട്രത്തെ അംഗീകരിക്കുന്നതാണ് ഹമാസിനെ ഒറ്റപ്പെടുത്താനുള്ള ഏറ്റവും നല്ല വഴിയെന്നും മാക്രോണ്‍ കൂട്ടിച്ചേര്‍ത്തു.

ഹമാസിനെ ഒഴിവാക്കാനും നിലനില്‍ക്കുന്ന അറബ്-ഇസ്രായേല്‍ സംഘര്‍ഷത്തിന് രണ്ട് രാഷ്ട്രങ്ങളെന്ന പരിഹാരം കാണാനും ലക്ഷ്യമിട്ട് ഈ മാസം യുഎന്‍ പൊതുസഭയില്‍ (യുഎന്‍ജിഎ) പലസ്തീന്‍ രാഷ്ട്രത്തെ ഔദ്യോഗികമായി അംഗീകരിക്കുമെന്ന് ഫ്രാന്‍സും ബ്രിട്ടനും ഉള്‍പ്പെടെയുള്ള പാശ്ചാത്യ രാജ്യങ്ങള്‍ പ്രതിജ്ഞയെടുത്തിട്ടുണ്ട്.

സാമ്പത്തിക ഉപരോധങ്ങളെക്കുറിച്ചുള്ള ഒരു ചോദ്യത്തിന് മറുപടിയായി മാക്രോണ്‍ പറഞ്ഞു, ''ഗാസയിലെ ആക്രമണം ഇസ്രായേല്‍ സര്‍ക്കാര്‍ തുടരുകയാണെങ്കില്‍, അത് നമ്മള്‍ ചര്‍ച്ച ചെയ്യേണ്ട ഒരു കാര്യമാണ്.'

 'ഗാസയിലെ ഇത്തരത്തിലുള്ള ഓപ്പറേഷന്‍ പൂര്‍ണ്ണമായും വിപരീതഫലം നല്‍കുന്നതും ഒരു പരാജയവുമാണ്. നിങ്ങള്‍ ഇസ്രായേലിന്റെ പ്രതിച്ഛായയും വിശ്വാസ്യതയും നശിപ്പിക്കുകയാണ്, അത് ഈ പ്രദേശത്ത് മാത്രമല്ല, ലോകമെമ്പാടുമുള്ള പൊതുജനാഭിപ്രായത്തിലും ഇത് ബാധിക്കും.'ഗാസയില്‍ ഇസ്രായേല്‍ നടത്തുന്ന ആക്രമണങ്ങളെ വിമര്‍ശിച്ചുകൊണ്ട് ഫ്രഞ്ച് പ്രസിഡന്റ് പറഞ്ഞു.