ഫ്രഞ്ച് പ്രസിഡൻ്റിനെ തടഞ്ഞ് ന്യൂയോർക്ക് പോലീസ്: കാര്യം പറയാൻ ട്രംപിനെ വിളിച്ച് മാക്രോൺ

ന്യൂയോർക്ക്: ഐക്യരാഷ്ട്രസഭയുടെ പൊതുസഭയിൽ നടത്തിയ ദീർഘമായ പ്രസംഗത്തിനുശേഷം, ഫ്രഞ്ച് പ്രസിഡന്റ് ഇമ്മാനുവൽ മാക്രോൺ വിരമിക്കാൻ എംബസിയിലേക്ക് മടങ്ങുകയായിരുന്നു. എന്നാൽ യുഎസ് പ്രസിഡന്റ് ഡൊണാൾഡ് ട്രംപിന്റെ വാഹനവ്യൂഹത്തിന് കടന്നുപോകാൻ ന്യൂയോർക്ക് പോലീസിന് അദ്ദേഹത്തെ തടയേണ്ടിവന്നു.  

ട്രംപിന്റെ വരവിനായി എല്ലാ റോഡുകളും അടച്ചിരുന്നതിനാൽ മാക്രോൺ ന്യൂയോർക്കിലെ റോഡിൽ കുടുങ്ങിപ്പോയി. പരിഭ്രാന്തനായ മാക്രോൺ തന്റെ കാറിൽ നിന്നിറങ്ങി റോഡ് ബ്ലോക്കിനെക്കുറിച്ച് അന്വേഷിക്കാൻ പോലീസിനെ സമീപിച്ചു. സംഭവത്തിന്റെ വീഡിയോ സോഷ്യൽ മീഡിയയിൽ വൈറലായിട്ടുണ്ട്.

ജനക്കൂട്ടം നോക്കിനിൽക്കെ ഒരു ബാരിക്കേഡിന് സമീപം നിന്നുകൊണ്ട് മാക്രോൺ ട്രംപിനോട് വഴി തുറന്നുതരാൻ തമാശയായി ആവശ്യപ്പെട്ടു. എന്താണ് സംഭവിച്ചതെന്ന് ഊഹിക്കാമോ? എന്നും  മാക്രോൺ ട്രംപിനോട് പറയുന്നുണ്ട്. ഇതിനിടെ ട്രംപിന്റെ വാഹനവ്യൂഹം കടന്നുപോകുകയും കാൽനടയാത്രക്കാർക്ക് റോഡ് തുറന്നുകൊടുക്കുകയും ചെയ്തിരുന്നു. 

എന്നാൽ, ഫ്രഞ്ച് പ്രസിഡന്റ് കാറിൽ തിരികെ കയറിയില്ല, ട്രംപുമായി ഫോണിൽ സംസാരിച്ച് കാൽനടയായി യാത്ര തുടർന്നു.  ഒരു പ്രധാന രാജ്യത്തിന്റെ  പ്രസിഡന്റ് ഒരു തരത്തിലുള്ള ബഹളങ്ങളോ സുരക്ഷാ സംവിധാനങ്ങളോ ഇല്ലാതെ തെരുവുകളിൽ സഞ്ചരിക്കുന്നത് ന്യൂയോർക്കുകാർക്ക് ഒരു അപൂർവ കാഴ്ചയായിരുന്നു.