'അറപ്പില്ലാത്ത പ്രതികാരം'; ഖമേനിയുടെ കൊലപാതകികൾക്ക് കഠിനശിക്ഷ ഉറപ്പെന്ന് ഇറാൻ റെവല്യൂഷണറി ഗാർഡ് കോർപ്സ്

ടെഹ്‌റാന്‍:  തങ്ങളുടെ പരമോന്നത നേതാവ് ആയത്തുള്ള അലി ഖമേനിയെ വധിച്ചവര്‍ക്ക് 'കഠിനമായ ശിക്ഷ' നല്‍കുമെന്ന് ഇറാന്റെ കരുത്തുറ്റ സൈനിക വിഭാഗമായ ഇസ്ലാമിക് റെവല്യൂഷണറി ഗാര്‍ഡ് കോര്‍പ്‌സ് പ്രതിജ്ഞയെടുത്തു.

ഖമേനിയുടെ മരണം ഔദ്യോഗികമായി സ്ഥിരീകരിച്ചതിന് പിന്നാലെ ഞായറാഴ്ച പുറത്തിറക്കിയ പ്രസ്താവനയിലാണ് വിപ്ലവ ഗാര്‍ഡ് തിരിച്ചടിക്കുമെന്ന് മുന്നറിയിപ്പ് നല്‍കിയത്.

ഖമേനിയെ വധിച്ചവരോടുള്ള ഇറാനിയന്‍ ജനതയുടെ പ്രതികാരത്തിന്റെ കൈകള്‍ അറുതിയില്ലാത്തതാകുമെന്നും, കുറ്റവാളികളെ പിടികൂടി നിര്‍ണ്ണായകവും ഖേദകരവുമായ ശിക്ഷ നല്‍കുന്നത് വരെ അവര്‍ക്ക് രക്ഷയുണ്ടാകില്ലെന്നും ഗാര്‍ഡ് പ്രസ്താവനയില്‍ വ്യക്തമാക്കി.

ഖമേനിയുടെ വധത്തിന് കാരണക്കാരായ അമേരിക്കയെയും ഇസ്രായേലിനെയും ലക്ഷ്യം വെച്ചാണ് വിപ്ലവ ഗാര്‍ഡ് ഈ പ്രസ്താവന നടത്തിയത്.

ഖമേനിയുടെ വധവാര്‍ത്ത പുറത്തുവന്നതിന് തൊട്ടുപിന്നാലെ തന്നെ ഇറാന്റെ മിസൈല്‍ വിഭാഗം സജ്ജമായതായും ചില യുഎസ് താവളങ്ങള്‍ക്ക് നേരെ ആക്രമണം തുടങ്ങിയതായും റിപ്പോര്‍ട്ടുകളുണ്ട്.

ഇറാന്റെ പരമോന്നത അധികാര കേന്ദ്രമായ ഖമേനിയുടെ വധം രാജ്യത്തിന്റെ നിലനില്‍പ്പിന് നേരെയുള്ള വെല്ലുവിളിയായാണ് വിപ്ലവ ഗാര്‍ഡ് കാണുന്നത്.