ഇമ്രാൻ ഖാന്റെ മരണവാർത്തയെ തുടർന്ന് അദ്യാല ജയിലിൽ സംഘർഷം രൂക്ഷമാകുന്നു

ഇസ്ലാമാബാദ്: പാകിസ്ഥാന്‍ മുന്‍ പ്രധാനമന്ത്രി ഇമ്രാന്‍ ഖാന്റെ മരണത്തെക്കുറിച്ചുള്ള സ്ഥിരീകരിക്കാത്ത അവകാശവാദങ്ങള്‍ സോഷ്യല്‍ മീഡിയയില്‍ നിറയുന്നു.

പാകിസ്ഥാന്‍ രഹസ്യാന്വേഷണ ഏജന്‍സിയായ ഐഎസ്ഐയും സൈനിക മേധാവി അസിം മുനീറും ചേര്‍ന്ന് റാവല്‍പിണ്ടിയിലെ അദ്യാല ജയിലില്‍ വെച്ച് ഇമ്രാന്‍ഖാനെ വധിച്ചതായി ബലൂചിസ്ഥാന്‍ വിദേശകാര്യ മന്ത്രാലയം ആരോപിച്ചതിനെത്തുടര്‍ന്ന് ഊഹാപോഹങ്ങള്‍ ശക്തമായി.

മുന്‍ പ്രധാനമന്ത്രിയുടെ അവസ്ഥയെക്കുറിച്ചും അദ്ദേഹം എവിടെയാണെന്നും വിവരങ്ങള്‍ ആവശ്യപ്പെട്ട് ഇമ്രാന്‍ഖാന്റെ കുടുംബാംഗങ്ങളും പിടിഐ അനുയായികളും റാവല്‍പിണ്ടി സെന്‍ട്രല്‍ ജയിലിന് പുറത്ത് തടിച്ചുകൂടി.

1970 കളുടെ അവസാനത്തിലും 1980 കളുടെ തുടക്കത്തിലും ജനറല്‍ മുഹമ്മദ് സിയാ-ഉല്‍-ഹഖിന്റെ സൈനിക ഭരണത്തിന്‍ കീഴിലാണ് റാവല്‍പിണ്ടിയിലെ അദ്യാല ഗ്രാമത്തില്‍ നിന്ന് ഏകദേശം 4 കിലോമീറ്റര്‍ അകലെ സെന്‍ട്രല്‍ ജയില്‍ നിര്‍മ്മിച്ചത്. 

പാകിസ്ഥാന്റെ മുന്‍ പ്രധാനമന്ത്രി സുല്‍ഫിക്കര്‍ അലി ഭൂട്ടോയെ 1979 ല്‍ റാവല്‍പിണ്ടി ജില്ലാ ജയിലില്‍ വച്ച് തൂക്കിലേറ്റി. അദ്ദേഹത്തിന്റെ വധശിക്ഷയ്ക്ക് ശേഷം, പഴയ ജയില്‍ പൊളിച്ചുമാറ്റി, ആ സ്ഥലം ജിന്ന പാര്‍ക്കാക്കി മാറ്റി. തുടര്‍ന്ന്, ഒരു പുതിയ സൗകര്യം നിര്‍മ്മിക്കുകയും അദ്യാല ജയില്‍ എന്ന് നാമകരണം ചെയ്യുകയും ചെയ്തു.

മുന്‍ പാകിസ്ഥാന്‍ പ്രധാനമന്ത്രിയും പിഎംഎല്‍-എന്‍ മേധാവിയുമായ നവാസ് ഷെരീഫ് പലതവണ അദ്യാല ജയിലില്‍ തടവിലാക്കപ്പെട്ടിട്ടുണ്ട്.

2018 ജൂലൈയില്‍, ലണ്ടനില്‍ പ്രഖ്യാപിത വരുമാനത്തിനപ്പുറം ആഡംബര ഫ്‌ലാറ്റുകള്‍ സ്വന്തമാക്കിയതിന് അക്കൗണ്ടബിലിറ്റി കോടതി അദ്ദേഹത്തിന് 10 വര്‍ഷം തടവും, അഴിമതി വിരുദ്ധ ഏജന്‍സിയുമായി സഹകരിക്കുന്നതില്‍ പരാജയപ്പെട്ടതിന് ഒരു വര്‍ഷം കൂടി തടവും വിധിച്ചിരുന്നു.