'ഇന്ത്യന്‍ പതാക വാഹക കപ്പലുകളെ ഒരു പാകിസ്ഥാന്‍ തുറമുഖത്തും സന്ദര്‍ശിക്കാന്‍ അനുവദിക്കില്ല'. ഇന്ത്യ ഇറക്കുമതി വിലക്കിയതിന് പിന്നാലെ ഇന്ത്യന്‍ കപ്പലുകളെ വിലക്കി പാകിസ്ഥാന്‍, ഒരു തുറമുഖത്തും പ്രവേശനമില്ല

ഡല്‍ഹി: ഇന്ത്യന്‍ കപ്പലുകള്‍ പാക് തുറമുഖങ്ങളില്‍ പ്രവേശിക്കുന്നത് പാകിസ്ഥാന്‍ വിലക്കി. ചരക്ക് ഇറക്കുമതി നിരോധിക്കുകയും പാക് കപ്പലുകള്‍ തുറമുഖങ്ങളിലേക്ക് പ്രവേശിക്കുന്നത് നിരോധിക്കുകയും ചെയ്ത ഇന്ത്യയുടെ തീരുമാനത്തിന് മണിക്കൂറുകള്‍ക്ക് ശേഷമാണ് ഈ നീക്കം.

ഭീകരര്‍ക്കും അവരെ പിന്തുണയ്ക്കുന്നവര്‍ക്കുമെതിരെ 'ഉറച്ചതും നിര്‍ണ്ണായകവുമായ' നടപടി സ്വീകരിക്കാന്‍ രാജ്യം പ്രതിജ്ഞാബദ്ധമാണെന്ന് പ്രധാനമന്ത്രി നരേന്ദ്ര മോദി പറഞ്ഞതിന് തൊട്ടുപിന്നാലെയാണ് പാകിസ്ഥാനില്‍ നിന്ന് വരുന്നതോ അല്ലെങ്കില്‍ പാകിസ്ഥാനിലൂടെ കടത്തുന്നതോ ആയ സാധനങ്ങള്‍ ഇറക്കുമതി ചെയ്യുന്നതിനും പാകിസ്ഥാന്‍ കപ്പലുകള്‍ തുറമുഖങ്ങളില്‍ പ്രവേശിക്കുന്നതിനും ഇന്ത്യ നിരോധനം ഏര്‍പ്പെടുത്തിയത്.

ശനിയാഴ്ച വൈകുന്നേരം പാകിസ്ഥാന്‍ 'ഇന്ത്യന്‍ പതാക വാഹക കപ്പലുകളെ ഒരു പാകിസ്ഥാന്‍ തുറമുഖത്തും സന്ദര്‍ശിക്കാന്‍ അനുവദിക്കരുതെന്ന്' ഉത്തരവിട്ടതായി പാക് പത്രം ഡോണ്‍ റിപ്പോര്‍ട്ട് ചെയ്തു.