ഇറാൻ യുദ്ധം വ്യാപിക്കുന്നു: ഹിസ്ബുള്ളയുടെ ആക്രമണത്തിന് മറുപടിയായി ലെബനനിൽ ഇസ്രായേൽ വ്യോമാക്രമണം

ബെയ്‌റൂട്ട്: ഇറാന്റെ പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ടതിന് പിന്നാലെ മധ്യേഷ്യയിലെ സംഘര്‍ഷം ലെബനനിലേക്കും വ്യാപിക്കുന്നു.

ഇസ്രായേലിന് നേരെ ഹിസ്ബുള്ള നടത്തിയ മിസൈല്‍-ഡ്രോണ്‍ ആക്രമണങ്ങള്‍ക്ക് തിരിച്ചടിയായി തിങ്കളാഴ്ച ലെബനന്‍ തലസ്ഥാനമായ ബെയ്‌റൂട്ടിന്റെ തെക്കന്‍ മേഖലകളില്‍ ഇസ്രായേല്‍ അതിശക്തമായ വ്യോമാക്രമണം നടത്തി.

ഇറാന്റെ പിന്തുണയുള്ള ഹിസ്ബുള്ള, ഖമേനിയുടെ വധത്തിന് പ്രതികാരം ചെയ്യുമെന്ന് പ്രഖ്യാപിച്ചതിന് പിന്നാലെയാണ് അതിര്‍ത്തി കടന്നുള്ള ആക്രമണങ്ങള്‍ ശക്തമായത്. ഇതോടെ ശനിയാഴ്ച ഇറാനുനേരെ അമേരിക്കയും ഇസ്രായേലും ആരംഭിച്ച സൈനിക നീക്കം മേഖലയിലാകെ പടരുന്ന സാഹചര്യമാണ് നിലവിലുള്ളത്.

ഇതുവരെ 48 ഇറാനിയന്‍ നേതാക്കളെ വധിച്ചതായി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് അറിയിച്ചു. ഇറാനുമായുള്ള യുദ്ധം ഒരു മാസത്തോളം നീണ്ടുനിന്നേക്കാമെന്നും അദ്ദേഹം മുന്നറിയിപ്പ് നല്‍കി.

ആഗോള സാമ്പത്തിക പ്രതിസന്ധി: യുദ്ധം വ്യാപിച്ചതോടെ ആഗോള വിപണിയില്‍ എണ്ണവില കുതിച്ചുയരുകയാണ്. കപ്പല്‍ ഗതാഗതം, വ്യോമയാനം തുടങ്ങിയ മേഖലകളെ സംഘര്‍ഷം സാരമായി ബാധിച്ചു.

ഗള്‍ഫ് രാജ്യങ്ങളിലെ ബിസിനസ് മേഖലയെയും വിതരണ ശൃംഖലയെയും യുദ്ധം തകിടം മറിക്കുമെന്ന മുന്നറിയിപ്പുകള്‍ ഇതിനകം പുറത്തുവന്നിട്ടുണ്ട്.