'താലിബാനെ 'പാവ'യായി ഉപയോഗിച്ച് ന്യൂഡല്‍ഹി ഒരു 'പ്രോക്‌സി യുദ്ധം' നടത്തുന്നു'. ഇസ്താംബൂളിൽ താലിബാനുമായുള്ള സമാധാന ചർച്ച പരാജയപ്പെട്ടതിന് ഇന്ത്യയെ കുറ്റപ്പെടുത്തി പാകിസ്ഥാൻ

ഇസ്ലാമാബാദ്: അതിര്‍ത്തിയിലെ സമാധാന ചര്‍ച്ചകള്‍ പരാജയപ്പെട്ടതിനെത്തുടര്‍ന്ന് പാകിസ്ഥാന്‍ പ്രതിരോധ മന്ത്രി ഖ്വാജ ആസിഫ് അഫ്ഗാനിസ്ഥാനിലെ താലിബാന്‍ സര്‍ക്കാരിനെ വിമര്‍ശിച്ചു.

മേഖലയില്‍ അസ്വസ്ഥത സൃഷ്ടിക്കാന്‍ ഇന്ത്യയുടെ നിര്‍ദ്ദേശപ്രകാരം കാബൂള്‍ പ്രവര്‍ത്തിക്കുന്നുണ്ടെന്ന് ആസിഫ് ആരോപിച്ചു. താലിബാനെ 'പാവ'യായി ഉപയോഗിച്ച് ന്യൂഡല്‍ഹി ഒരു 'പ്രോക്‌സി യുദ്ധം' നടത്തുകയാണെന്ന് അദ്ദേഹം പറഞ്ഞു.

'കാബൂളിലെ സര്‍ക്കാരിലേക്ക് ഇന്ത്യ നുഴഞ്ഞുകയറി. ന്യൂഡല്‍ഹി അഫ്ഗാനിസ്ഥാനിലൂടെ ഒരു നിഴല്‍ യുദ്ധം ആരംഭിച്ചിരിക്കുന്നു. ഇതില്‍ യാതൊരു സംശയവുമില്ല,' പാകിസ്ഥാന്‍ ടിവി ചാനലായ ജിയോ ന്യൂസിനോട് സംസാരിക്കവെ ആസിഫ് പറഞ്ഞു.

അഫ്ഗാന്‍ പക്ഷം നാലോ അഞ്ചോ തവണ നിലപാട് മാറ്റിയതിനാല്‍ പാകിസ്ഥാനും അഫ്ഗാനിസ്ഥാനും തമ്മില്‍ തുര്‍ക്കിയില്‍ അടുത്തിടെ നടന്ന ചര്‍ച്ച പരാജയപ്പെട്ടുവെന്ന് ആസിഫ് പറഞ്ഞു.

'ഞങ്ങള്‍ ഒരു കരാറിലേക്ക് അടുക്കുമ്പോഴെല്ലാം ചര്‍ച്ചക്കാര്‍ കാബൂളില്‍ ഇടപെട്ടു, അതോടെ കരാര്‍ പിന്‍വലിക്കപ്പെട്ടു,' അദ്ദേഹം കൂട്ടിച്ചേര്‍ത്തു