എച്ച്-1ബി വിസയ്ക്ക് പരിഹാരം കണ്ടെത്തി ചൈന , പുതിയ 'കെ വിസ' അവതരിപ്പിച്ചു

ബെയ്ജിംഗ്: യുഎസ് പ്രസിഡന്റ് ഡൊണാള്‍ഡ് ട്രംപ് എച്ച്-1ബി വിസകള്‍ക്ക് ഉയര്‍ന്ന ഫീസ് ഏര്‍പ്പെടുത്തിയതിനെത്തുടര്‍ന്ന് ആഗോള സമ്പദ്വ്യവസ്ഥ പ്രതിസന്ധിയിലാണ്.

ട്രംപിന്റെ തീരുമാനം ഇന്ത്യയ്ക്ക് വലിയ തിരിച്ചടിയായി. വിദേശ തൊഴിലാളികള്‍ക്ക് യുഎസ് വാതിലുകള്‍ അടയ്ക്കുമ്പോള്‍, ആഗോള പ്രതിഭകള്‍ക്ക് മുന്നില്‍ ചൈന വാതിലുകള്‍ തുറക്കാന്‍ തീരുമാനിച്ചു.

ലോകമെമ്പാടുമുള്ള യുവ ശാസ്ത്രജ്ഞരെയും സാങ്കേതിക വിദഗ്ധരെയും ആകര്‍ഷിക്കാന്‍ ലക്ഷ്യമിട്ടുള്ള ട്രംപിന്റെ എച്ച്-1ബി വിസ പ്രോഗ്രാമിന് എതിരായി 'കെ വിസ' അവതരിപ്പിക്കാന്‍ ചൈന തീരുമാനിച്ചു.

ചൈനീസ് വാര്‍ത്താ ഏജന്‍സിയായ സിന്‍ഹുവയുടെ റിപ്പോര്‍ട്ട് പ്രകാരം 'കെ വിസ'യുമായി ബന്ധപ്പെട്ട പുതിയ നിയമങ്ങള്‍ ഒക്ടോബര്‍ 1 മുതല്‍ പ്രാബല്യത്തില്‍ വരും.

ചൈന ഇതിനകം 12 തരം വിസകള്‍ വാഗ്ദാനം ചെയ്യുന്നു. ഇപ്പോള്‍, 'കെ വിസ'യും ഈ പട്ടികയിലേക്ക് ചേര്‍ക്കാന്‍ പോകുന്നു.

ചൈനയുടെ മറ്റ് 12 വിസകളില്‍ നിന്ന് വ്യത്യസ്തമായിരിക്കും കെ വിസ. കെ വിസ ഉപയോഗിച്ച് ചൈനയിലേക്ക് പ്രവേശിക്കുന്നവര്‍ക്ക് വിദ്യാഭ്യാസം, സംസ്‌കാരം, ശാസ്ത്ര സാങ്കേതിക വിദ്യ, ബിസിനസ്സ് തുടങ്ങിയ മേഖലകളില്‍ പങ്കെടുക്കാന്‍ കഴിയും.

 ഈ വിസ ലഭിക്കുന്നതിന് ചൈന ചില യോഗ്യതാ മാനദണ്ഡങ്ങള്‍ നിശ്ചയിക്കും. വിസ ഉടമ ചില രേഖകളും സമര്‍പ്പിക്കേണ്ടതുണ്ട്. പ്രായപരിധി, ഉന്നത വിദ്യാഭ്യാസം, യോഗ്യത, പരിചയം എന്നിവയുള്ള വ്യക്തികള്‍ക്ക് മാത്രമേ ചൈന കെ വിസ അനുവദിക്കൂ.