പാക്-അഫ്ഗാൻ അതിർത്തിയിൽ കനത്ത ഏറ്റുമുട്ടൽ, തുടർന്ന് താലിബാൻ മുന്നറിയിപ്പ്

കാബൂള്‍: ഇസ്ലാമാബാദ് സ്വന്തം മണ്ണില്‍ വ്യോമാക്രമണം നടത്തിയെന്ന് ആരോപിച്ച് അഫ്ഗാനിസ്ഥാനിലെ താലിബാന്‍ സേന. പാകിസ്ഥാന്‍ സൈനികര്‍ക്കെതിരെ താലിബാന്‍ സായുധ ആക്രമണം നടത്തിയതായി നിരവധി പ്രവിശ്യകളില്‍ നിന്നുള്ള മുതിര്‍ന്ന ഉദ്യോഗസ്ഥര്‍ പറഞ്ഞു.

വ്യാഴാഴ്ച, അഫ്ഗാന്‍ തലസ്ഥാനത്ത് രണ്ട് സ്‌ഫോടനങ്ങളും രാജ്യത്തിന്റെ തെക്കുകിഴക്കന്‍ ഭാഗങ്ങളില്‍ മറ്റൊന്നും കേട്ടു. അടുത്ത ദിവസം, താലിബാന്‍ നിയന്ത്രിക്കുന്ന പ്രതിരോധ മന്ത്രാലയം ആക്രമണങ്ങള്‍ക്ക് പാകിസ്ഥാനെ കുറ്റപ്പെടുത്തി, അയല്‍ക്കാരന്‍ തങ്ങളുടെ പരമാധികാരം ലംഘിച്ചുവെന്ന് ആരോപിച്ചു.

'കാബൂളില്‍ പാകിസ്ഥാന്‍ സൈന്യം നടത്തിയ വ്യോമാക്രമണങ്ങള്‍ക്ക് പ്രതികാരമായി,' അതിര്‍ത്തിയിലെ വിവിധ പ്രദേശങ്ങളില്‍ പാകിസ്ഥാന്‍ സുരക്ഷാ സേനയ്ക്കെതിരെ താലിബാന്‍ സേന കനത്ത ഏറ്റുമുട്ടലില്‍ ഏര്‍പ്പെട്ടിട്ടുണ്ടെന്ന് അഫ്ഗാന്‍ സൈന്യം പ്രസ്താവനയില്‍ പറഞ്ഞു.

പിന്നീട്,  'വിജയകരമായ' പ്രവര്‍ത്തനങ്ങള്‍ അര്‍ദ്ധരാത്രിയോടെ അവസാനിച്ചതായി താലിബാന്‍ പ്രതിരോധ മന്ത്രാലയ വക്താവ് എനായത് ഖോവാരസം എഎഫ്പിയോട് പറഞ്ഞു.

'എതിര്‍കക്ഷി വീണ്ടും അഫ്ഗാനിസ്ഥാന്റെ പ്രദേശം ലംഘിച്ചാല്‍, നമ്മുടെ സായുധ സേന അവരുടെ പ്രദേശം സംരക്ഷിക്കാന്‍ തയ്യാറാണ്, ശക്തമായി പ്രതികരിക്കും. അദ്ദേഹം മുന്നറിയിപ്പ് നല്‍കി: 

വ്യാഴാഴ്ചത്തെ ആക്രമണത്തിന് പിന്നില്‍ ഇസ്ലാമാബാദ് ആണെന്ന് സ്ഥിരീകരിച്ചിട്ടില്ല, എന്നാല്‍ കാബൂളിനോട് 'പാകിസ്ഥാന്‍ താലിബാന് (ടിടിപി) സ്വന്തം മണ്ണില്‍ അഭയം നല്‍കുന്നത് നിര്‍ത്താന്‍' ആവശ്യപ്പെട്ടു.