ഇറാനിൽ മൊജ്തബ ഖമേനി യുഗം: അധികാരമേറ്റതിന് പിന്നാലെ മിസൈൽ വർഷം; പശ്ചിമേഷ്യയിൽ യുദ്ധം പടരുന്നു

ടെഹ്റാന്‍: അന്താരാഷ്ട്ര സമ്മര്‍ദ്ദങ്ങളെയും ഭീഷണികളെയും കാറ്റില്‍പ്പറത്തി ഇറാന്‍ പുതിയ പരമോന്നത നേതാവിനെ പ്രഖ്യാപിച്ചു.

കൊല്ലപ്പെട്ട ആയത്തുള്ള അലി ഖമേനിയുടെ മകന്‍ മൊജ്തബ ഖമേനി (56) ആണ് രാജ്യത്തിന്റെ മൂന്നാമത്തെ പരമോന്നത നേതാവായി ചുമതലയേറ്റത്. അധികാര കൈമാറ്റത്തിന് പിന്നാലെ ഇസ്രായേലിന് നേരെ ഇറാന്‍ ശക്തമായ മിസൈല്‍ ആക്രമണം നടത്തിയതോടെ പശ്ചിമേഷ്യന്‍ മേഖല പൂര്‍ണ്ണ തോതിലുള്ള യുദ്ധത്തിലേക്ക് നീങ്ങുകയാണ്.

അലി ഖമേനിയുടെ മരണത്തിന് ഒന്‍പതാം ദിവസം ചേര്‍ന്ന 88 അംഗ 'അസംബ്ലി ഓഫ് എക്‌സ്‌പെര്‍ട്‌സ്' ഏകകണ്ഠമായാണ് മൊജ്തബയെ തിരഞ്ഞെടുത്തത്. അമേരിക്കയുടെയും ഇസ്രായേലിന്റെയും ഭീഷണികള്‍ക്കിടയിലും ഒട്ടും വൈകാതെയാണ് ഈ തീരുമാനമെന്ന് സമിതി പ്രസ്താവിച്ചു.

പുതിയ നേതാവിനോടുള്ള ആദരസൂചകമായി 'സയ്യിദ് മൊജ്തബയുടെ കല്പനപ്രകാരം' എന്ന സന്ദേശമെഴുതിയ മിസൈലുകള്‍ ഇസ്രായേലിന് നേരെ തൊടുത്തു. ഇസ്രായേലിന്റെ വാണിജ്യ തലസ്ഥാനമായ തെല്‍ അവീവില്‍ സ്‌ഫോടനങ്ങള്‍ റിപ്പോര്‍ട്ട് ചെയ്യപ്പെട്ടു.

ഗള്‍ഫ് രാജ്യങ്ങളിലെ എണ്ണ ശുദ്ധീകരണ ശാലകള്‍ക്ക് നേരെയുള്ള ആക്രമണം ക്രൂഡ് ഓയില്‍ വില ബാരലിന് 100 ഡോളര്‍ കടക്കാന്‍ കാരണമായി. നാല് വര്‍ഷത്തിനിടയിലെ ഏറ്റവും ഉയര്‍ന്ന നിരക്കാണിത്.

ലബനന്‍ തലസ്ഥാനമായ ബെയ്റൂട്ടിന്റെ മധ്യഭാഗത്തുള്ള ഹോട്ടലിന് നേരെ ഇസ്രായേല്‍ ആക്രമണം നടത്തി. ഇറാനിയന്‍ റെവല്യൂഷണറി ഗാര്‍ഡ്സിലെ അഞ്ച് കമാന്‍ഡര്‍മാരെ ലക്ഷ്യമിട്ടായിരുന്നു ഈ നീക്കം.

ഇറാന്റെ കണക്കനുസരിച്ച് ഇതുവരെ 1,200 സാധാരണക്കാര്‍ കൊല്ലപ്പെട്ടു. ലബനനില്‍ മരിച്ചവരുടെ എണ്ണം 394 ആയി ഉയര്‍ന്നു. തെഹ്റാനിലെ എണ്ണശാലകള്‍ക്ക് നേരെയുണ്ടായ ആക്രമണം നഗരത്തിലെ വായു അത്യന്തം മലിനമാക്കിയിരിക്കുകയാണ്.

സൗദി അറേബ്യ, ഖത്തര്‍, കുവൈറ്റ്, ബഹ്റൈന്‍ എന്നിവിടങ്ങളിലും സ്‌ഫോടനങ്ങള്‍ റിപ്പോര്‍ട്ട് ചെയ്തു. കുവൈറ്റ് അന്താരാഷ്ട്ര വിമാനത്താവളത്തിലെ ഇന്ധന ടാങ്കുകള്‍ക്കും നാശനഷ്ടം സംഭവിച്ചു.