പാകിസ്ഥാനിലെ ഗുജ്രൻവാലയിലെ ലഷ്‌കർ ഭീകര ക്യാമ്പിൽ മുഖ്യാതിഥിയായി ഹമാസ് ഭീകരൻ നാജി സഹീർ പങ്കെടുത്തു

ഇസ്ലാമാബാദ്: ഹമാസിന്റെയും ലഷ്‌കര്‍-ഇ-തൊയ്ബ (എല്‍ഇടി) കമാന്‍ഡര്‍മാരുടെയും കൂടിക്കാഴ്ചയ്ക്ക് വേദിയായി പാകിസ്ഥാന്‍.

ലഷ്‌കറിന്റെ രാഷ്ട്രീയ മുന്നണിയെന്ന് പരക്കെ വിശ്വസിക്കപ്പെടുന്ന പാകിസ്ഥാന്‍ മര്‍കാസി മുസ്ലീം ലീഗ് (പിഎംഎംഎല്‍) ആതിഥേയത്വം വഹിച്ച ഒരു പരിപാടിക്കിടെ, മുതിര്‍ന്ന ഹമാസ് കമാന്‍ഡര്‍ നാജി സഹീര്‍ പാകിസ്ഥാനിലെ ഗുജ്റന്‍വാലയില്‍ ലഷ്‌കര്‍-ഇ-തൊയ്ബ ഭീകര ക്യാമ്പില്‍ മുഖ്യാതിഥിയായി പങ്കെടുത്തു.

തീവ്രവാദ സംഘടനകളുമായി ബന്ധപ്പെട്ട നേതാക്കളുടെ വേദിയിലെ സാന്നിധ്യം ഈ തീവ്രവാദ ശൃംഖലകളുടെ പരസ്പര ബന്ധത്തെക്കുറിച്ച് വീണ്ടും ചോദ്യങ്ങള്‍ ഉയര്‍ത്തുന്നു.

സഹീറും സന്ധുവും ഒരു വേദി പങ്കിടുന്നതിന്റെ തീയതി രേഖപ്പെടുത്താത്ത വീഡിയോ പുറത്തുവന്നതോടെയാണ് കൂടിക്കാഴ്ച ശ്രദ്ധയില്‍പ്പെട്ടത്. ലഭ്യമായ വിവരങ്ങള്‍ അനുസരിച്ച്, ഗുജ്രന്‍വാലയില്‍ നടന്ന പിഎംഎംഎല്‍ പരിപാടിയില്‍ മുഖ്യാതിഥിയായി സഹീര്‍ പങ്കെടുത്തു. യുഎസ് നിരോധിത തീവ്രവാദ ഗ്രൂപ്പുകള്‍ തമ്മിലുള്ള ബന്ധം വികസിക്കുന്നതിന്റെ സൂചനയാണ് ഈ കൂടിക്കാഴ്ച.

പഹല്‍ഗാം ഭീകരാക്രമണത്തിന് ഏതാനും ദിവസങ്ങള്‍ക്ക് മുമ്പ്, 2025 ഫെബ്രുവരിയില്‍ മറ്റ് ഹമാസ് ഉദ്യോഗസ്ഥരോടൊപ്പം പാക് അധിനിവേശ കശ്മീര്‍ (പിഒകെ) സന്ദര്‍ശിച്ച ഹമാസ് നേതാവായിരുന്നു സഹീര്‍. സന്ദര്‍ശന വേളയില്‍, ലഷ്‌കര്‍-ഇ-തൊയ്ബ, ജെയ്ഷ്-ഇ-മുഹമ്മദ് കമാന്‍ഡര്‍മാര്‍ക്കൊപ്പം ഇന്ത്യാ വിരുദ്ധ സംയുക്ത റാലിയെ അഭിസംബോധന ചെയ്തു.

2024 ജനുവരിയില്‍, സഹീര്‍ കറാച്ചി സന്ദര്‍ശിച്ചു, അവിടെ കറാച്ചി പ്രസ് ക്ലബ്ബില്‍ മാധ്യമങ്ങളെ അഭിസംബോധന ചെയ്തു. 2024 ഏപ്രിലില്‍ ഇസ്ലാമാബാദും സന്ദര്‍ശിച്ചു, അവിടെ ഇസ്ലാമാബാദ് ഹൈക്കോടതി ബാര്‍ അസോസിയേഷന്‍ ഇയാളെ ആദരിച്ചു.

ഇതിനുപുറമെ, 2023 ഒക്ടോബര്‍ 14 ന്, തെക്കന്‍ ഇസ്രായേലില്‍ ഒക്ടോബര്‍ 7 ന് നടന്ന ഭീകരാക്രമണത്തിന് വെറും ഒരാഴ്ച കഴിഞ്ഞ്, സഹീര്‍ പാകിസ്ഥാന്‍ സന്ദര്‍ശിക്കുകയും രാജ്യത്തെ ഏറ്റവും വലിയ ഇസ്ലാമിക രാഷ്ട്രീയ പാര്‍ട്ടിയായ ജാമിയത്ത് ഉലമ-ഇ-ഇസ്ലാമിന്റെ തലവന്‍ മൗലാന ഫസല്‍-ഉര്‍-റഹ്‌മാനെ കാണുകയും ചെയ്തിരുന്നു.

2023 ഒക്ടോബര്‍ 29-ന് ബലൂചിസ്ഥാനിലെ ക്വറ്റയില്‍ നടന്ന 'അല്‍-അഖ്സ സ്റ്റോം' സമ്മേളനത്തില്‍ സഹീര്‍ പങ്കെടുത്തു. ഇതിനുപുറമെ, 2023 നവംബറില്‍ കറാച്ചിയില്‍ നടന്ന 'തൂഫാന്‍-ഇ-അഖ്സ' സമ്മേളനത്തില്‍ വീഡിയോ വഴി ചേര്‍ന്ന മഷാലിനൊപ്പം വീണ്ടും പ്രത്യക്ഷപ്പെട്ടു.