അമേരിക്കൻ ഫണ്ട് വെട്ടിക്കുറച്ചു: യു.എൻ. സമാധാന സേനാംഗങ്ങളിൽ നിന്നും 25% സൈനികരെയും തിരിച്ചയക്കും

ന്യൂയോർക്ക്: അമേരിക്കയുടെ സാമ്പത്തിക സഹായം കുറച്ചതിനെ തുടർന്ന്, ഐക്യരാഷ്ട്രസഭയുടെ (യു.എൻ.) ആഗോള സമാധാന സേനയിലെ 25 ശതമാനം അംഗങ്ങളെ വെട്ടിക്കുറയ്ക്കാൻ ഒരുങ്ങുന്നതായി റിപ്പോർട്ടുകൾ.

ഐക്യരാഷ്ട്രസഭയുടെ ബഡ്ജറ്റുകൾ അനാവശ്യമാണെന്ന് ആരോപിച്ചുകൊണ്ട് ട്രംപ് ഭരണകൂടം സാമ്പത്തിക സഹായങ്ങൾ വെട്ടിക്കുറച്ചിരുന്നു. 

ഇതേത്തുടർന്ന്, യു.എൻ. അതിൻ്റെ അന്താരാഷ്ട്ര സമാധാന സേനയിൽ നിന്നും മറ്റ് പ്രവർത്തനങ്ങളിൽ ഏർപ്പെട്ടിരിക്കുന്നവരിൽ നിന്നും 25 ശതമാനം പേരെ കുറയ്ക്കാൻ പദ്ധതിയിടുന്നതായാണ് റിപ്പോർട്ട്.

ഇതിൻ്റെ ഫലമായി 13,000 മുതൽ 14,000 വരെ സൈനികരെ അതത് രാജ്യങ്ങളിലേക്ക് തിരിച്ചയക്കേണ്ടിവരും എന്നാണ് സൂചന. 

ഇതുകാരണം വെടിനിർത്തൽ നിരീക്ഷണം, സംഘർഷ മേഖലകളിലെ പൊതുജന സംരക്ഷണം, മനുഷ്യത്വപരമായ ദൗത്യങ്ങൾ എന്നിവയെല്ലാം പ്രതികൂലമായി ബാധിക്കപ്പെടാൻ സാധ്യതയുണ്ട്. 

നിലവിൽ, ആഗോള തലത്തിലുള്ള യു.എൻ. ദൗത്യങ്ങളിൽ 50,000-ത്തിലധികം സമാധാന സേനാംഗങ്ങൾ ഉണ്ട്.

പ്രത്യേകിച്ചും കോംഗോ, ദക്ഷിണ സുഡാൻ, ലെബനൻ, മധ്യ ആഫ്രിക്കൻ റിപ്പബ്ലിക് തുടങ്ങിയ സംഘർഷഭരിതമായ മേഖലകളിലാണ് ഇവർ പ്രധാനമായും സേവനം അനുഷ്ഠിക്കുന്നത്.