സമാധാനപരമായ ആവശ്യങ്ങൾക്ക്​ മാത്രമാണ്​ ആണവ പദ്ധതി. ഉപരോധങ്ങൾ പിൻവലിക്കണം. ഇറാൻ-അമേരിക്ക ആണവ ചർച്ച വിജയമെന്ന്​ ഇരുപക്ഷവും

ന്യൂയോര്‍ക്ക്: മസ്കത്ത്​ ചർച്ചയോടെ ഇറാൻ-അമേരിക്ക സംഘർഷത്തിന്​ താൽക്കാലിക അയവ്. മസ്കത്തിൽ ഇന്നലെ നടന്ന ഇറാൻ-അമേരിക്ക ആണവ ചർച്ച വിജയമെന്ന്​ ഇരുപക്ഷവും വ്യക്​തമാക്കി.

ഇറാൻ വിദേശകാര്യമന്ത്രി അബ്ബാസ് അരാഗ്ചിയും അമേരിക്കയുടെ പശ്ചിമേഷ്യൻ പ്രതിനിധി സ്റ്റീവ് വിറ്റ്‌കോഫുമാണ് വെവ്വേറെ മുറികളിലിരുന്ന്‌ ചർച്ചകൾക്ക്‌ നേതൃത്വം നൽകിയത്‌. ഒമാൻ വിദേശമന്ത്രി ബദർ അൽ ബുസൈദി മധ്യസ്ഥനായി.

രണ്ടാംവട്ട ചർച്ച ഈ മാസം 19ന്​ നടക്കുമെന്ന്​ യുഎസ്​ പശ്​ചിമേഷ്യൻ പ്രതിനിധി സ്റ്റിവ്​ വിറ്റ്​കോഫ്​ അറിയിച്ചു. ആണവ വിഷയത്തിലുള്ള യുഎസ്​ ഉത്​കണ്ഠ ഇറാനെ ബോധ്യപ്പെടുത്തി രമ്യമായ പരിഹാര നടപടി ആവശ്യപ്പെട്ടതായി സ്റ്റിവ്​ വിറ്റ്​കോഫ്​ പറഞ്ഞു.

സമാധാനപരമായ ആവശ്യങ്ങൾക്ക്​ മാത്രമാണ്​ ആണവ പദ്ധതിയെന്നും അതിന്‍റെ പേരിൽ ഏർപ്പെടുത്തിയ ഉപരോധങ്ങൾ പിൻവലിക്കണമെന്നും ചർച്ചയിൽ ആവശ്യപ്പെട്ടതായി അബ്ബാസ് അരഘ്ചി പ്രതികരിച്ചു.