എന്നെ യുഎസിലേക്ക് കൈമാറിയത് മുതല്‍ എനിക്ക് കോണ്‍സുലാര്‍ ആക്‌സസ് ഒന്നും ലഭിച്ചിട്ടില്ല. ഇന്ത്യന്‍ എംബസിയില്‍ നിന്ന് ആരും എന്നെ കാണാന്‍ വന്നിട്ടില്ല. എന്റെ വീട്ടുകാര്‍ പലതവണ ഇക്കാര്യം ആവശ്യപ്പെട്ടിരുന്നു. എന്നിട്ടും ആരും എന്നെ കാണാന്‍ വന്നില്ല. സര്‍ക്കാര്‍ തന്നെ തിരിഞ്ഞു നോക്കുന്നില്ലെന്ന് പന്നുന്‍ കേസിലെ പ്രതി നിഖില്‍ ഗുപ്ത

ഡല്‍ഹി: ഖാലിസ്ഥാനി ഭീകരന്‍ ഗുര്‍പത്വന്ത് സിംഗ് പന്നുവിനെ വധിക്കാന്‍ ഗൂഢാലോചന നടത്തിയെന്ന് ആരോപിക്കപ്പെടുന്ന നിഖില്‍ ഗുപ്തയുമായി ബന്ധപ്പെട്ട പുതിയ വിവരങ്ങള്‍ പുറത്ത്. 

'അമേരിക്കന്‍ ജസ്റ്റിസ് ഡിപ്പാര്‍ട്ട്മെന്റ്' ആണ് ഗുപ്തയ്ക്കെതിരെ ആരോപണം ഉന്നയിച്ചിരിക്കുന്നത്. അതേസമയം താന്‍ നിരപരാധിയാണെന്നാണ് നിഖില്‍ ഗുപ്ത പറയുന്നത്.

ആരോപണത്തെ തുടര്‍ന്ന് ചെക്ക് റിപ്പബ്ലിക്കില്‍ നിന്ന് അമേരിക്കയിലേക്ക് ഇയാളെ നാടുകടത്തിയിരുന്നു. കുടുംബം ആവര്‍ത്തിച്ച് അഭ്യര്‍ത്ഥിച്ചിട്ടും തന്നെ കൈമാറിയിട്ട് ഏഴ് മാസമായിട്ടും ഇന്ത്യന്‍ സര്‍ക്കാരില്‍ നിന്ന് ആരും തന്നെ ബന്ധപ്പെട്ടിട്ടില്ലെന്ന് നിഖില്‍ പറഞ്ഞു

എന്നെ യുഎസിലേക്ക് കൈമാറിയത് മുതല്‍ എനിക്ക് കോണ്‍സുലാര്‍ ആക്‌സസ് ഒന്നും ലഭിച്ചിട്ടില്ല. ഇന്ത്യന്‍ എംബസിയില്‍ നിന്ന് ആരും എന്നെ കാണാന്‍ വന്നിട്ടില്ല. എന്റെ വീട്ടുകാര്‍ പലതവണ ഇക്കാര്യം ആവശ്യപ്പെട്ടിരുന്നു. എന്നിട്ടും ആരും എന്നെ കാണാന്‍ വന്നില്ല. 

കോണ്‍സുലാര്‍ പ്രവേശനം എന്നാല്‍ മറ്റൊരു രാജ്യത്ത് തടവിലാക്കപ്പെട്ടയാളെ തന്റെ രാജ്യത്തെ നയതന്ത്രജ്ഞനെയോ ഉദ്യോഗസ്ഥനെയോ കാണാന്‍ അനുവദിക്കുക എന്നാണ്.

ന്യൂയോര്‍ക്കിലെ ബ്രൂക്ലിനിലെ മെട്രോപൊളിറ്റന്‍ ഡിറ്റന്‍ഷന്‍ സെന്ററിലാണ് നിഖില്‍ കഴിയുന്നത്. 

ഇതിനുമുമ്പ് ചെക്ക് റിപ്പബ്ലിക്കിന്റെ തലസ്ഥാനമായ പ്രാഗില്‍ നിഖില്‍ ഒരു വര്‍ഷത്തോളം കസ്റ്റഡിയിലായിരുന്നു. ഈ കാലയളവില്‍ തനിക്ക് മൂന്ന് തവണ ഇന്ത്യന്‍ കോണ്‍സുലര്‍ പ്രവേശനം ലഭിച്ചതായി അദ്ദേഹം പറഞ്ഞു.

2023 അവസാനത്തോടെ ഗുപ്തയുടെ കുടുംബം സുപ്രീം കോടതിയില്‍ ഹര്‍ജി നല്‍കി. വിഷയത്തില്‍ സുപ്രീംകോടതി ഇടപെടണമെന്ന് അദ്ദേഹം ആവശ്യപ്പെട്ടിരുന്നുവെങ്കിലും കോടതി ഹര്‍ജി തള്ളുകയായിരുന്നു

ഇത് സെന്‍സിറ്റീവ് വിഷയമാണെന്നും സര്‍ക്കാര്‍ ഇക്കാര്യത്തില്‍ നടപടിയെടുക്കണമെന്നും കോടതി പറഞ്ഞു. തന്റെ കുടുംബം വിദേശകാര്യ മന്ത്രാലയത്തിലെ ഉദ്യോഗസ്ഥര്‍ക്ക് ഇമെയിലുകള്‍ അയച്ചിരുന്നുവെന്നും എന്നാല്‍ ആരെയും കണ്ടില്ലെന്നും ഗുപ്ത പറഞ്ഞു.

53 കാരനായ വികാസ് യാദവും ഈ കേസില്‍ പ്രതിയാണ്. വികാസുമായി തനിക്ക് ഒരു ബന്ധവുമില്ലെന്ന് ഗുപ്ത  പറഞ്ഞു. അമേരിക്ക ഹാജരാക്കിയ തെളിവുകള്‍ കെട്ടിച്ചമച്ചതാണെന്ന് അദ്ദേഹം പറയുന്നു.

നിഖില്‍ ഗുപ്തയില്‍ നിന്ന് വ്യത്യസ്തമായി വികാസ് യാദവ് ഇന്ത്യയിലാണ് താമസിക്കുന്നത്. ഡല്‍ഹി സ്പെഷ്യല്‍ സെല്‍ ചുമത്തിയ പണം തട്ടിപ്പ് കേസില്‍ ഇപ്പോള്‍ ജാമ്യത്തിലാണ്.